25:517  517  COMMENTARIUS  IN  IOSUE  CAP.  XIII.  518  opibus  sic  dictum  :  quia  Cambyses  bellum  in  Graecia  gesturus  thesauros  suos  illic  deposuerat.  Sed  quia  apud  Lucam  (Act.  8,  26)  mentio  fit  Gazae  desertae,  apparet  urbem  eiusdem  nominis  prope  quidem,  sed  alio  loco  fuisse  exstructam.  Asdod  ea  est  quam  Graeci  dixerunt  Azotum.  Perducitur  autem  totus  hic  tractus  maritimus  vel  qui  ad  mare  vergit  usque  ad  Sidonem.  Et  sunt  qui  putent:  Phoenices  Gazae  quoque  et  Azoti  olim  fuisse  dominos.  Quam  longe  se  portendat  Libanus  satis  notum  est.  Montem  enim  Hermon  aliquando  comprehendit:  et  propter  longitudinem  pars  Antilibanus  cognominatur.  De  monte  Hermon  reperient  lectores  Deuter.  4.  Versus  orientem  est  Haemath,  quae  et  Antiochia  Syriae.  6.  Omnes  habitatores  montis.  Iterum  monetur  Iosue,  quamvis  regiones  illas  nondum  possideant  Israelitae,  ne  tamen  sortitionem  differat,  Dei  promissione  fretus,  quia  maligne  eius  virtuti  detraheret,  si  ambigeret  de  eventu.  Ideo  dicitur:  Tantum  quod  tui  officii  est  praesta  in  distributione  terrae:  nec  a  sorte  eximatur  quod  adhuc  secure  obtinent  hostes:  quia  mihi  curae  erit  quod  promisi  implere.  Hinc  discamus,  in  suscipiendis  negotiis  sic  pendere  ab  ore  Dei,  ne  qua  dubitatio  nos  moretur.  Non  est  quidem  nostrum,  vanas  spes  nobis  fabricare:  verum  ubi  in  Deo  fundata  est  nostra  fiducia,  tantummodo  obtemperemus  suis  mandatis:  quia  metuendum  non  est,  ne  eventus  nos  frustretur.  Postea  novem  tribubus  et  dimidiae  terram  Chanaan  assignat:  quia  trans  Iordanem  Rubenitis,  et  Gaditis,  et  dimidiae  tribui  Manasse  data  sit  sua  portio.  Etsi  autem  videtur  in  his  verbis  esse  battologia:  Quas  dedit  illis  Moses,  sicut  dedit  illis  Moses,  nihil  tamen  superfluum  est:  quia  secundo  membro  confirmatur  donatio:  ac  si  Deus  ratum  esse  iuberet  quod  factum  est.  Sicut  ergo  dedit  illis  Moses  terram  illam,  ita  in  eius  possessione  tranquilli  maneant.  Hac  quoque  ratione  insignitur  elogio  servi  Dei:  ne  quis  convellat  decretum  illud  quod  ex  Dei  autoritate  protulit  fidelis  minister.  Et  certe  litibus  obviam  ire  necesse  fuit,  quae  alioqui  quotidie  subortae  forent.  14.  Tantum  tribui  Levi.  Necessaria  fuit  haec  quoque  exceptio,  ne  se  Levitae  iniuste  fuisse  exhaeredatos  obtenderent,  atque  ita  de  suo  iure  moverent  magnas  turbas.  Admonet  igitur  huius  distinctionis  Mosen  esse  autorem:  simulque  docet,  non  esse  cur  querantur  sibi  quidquam  fuisse  ereptum,  quia  praeclara  compensatio  data  fuerit.  Quamvis  autem  non  distribuerentur  ex  aequo  sacrificia  inter  Levitas:  satis  tamen  est  alimenta  ex  primitiis  et  decimis  fuisse  omnibus  data.  Porro  sicuti  Deus  mercede  eos  allicit  ad  subeundam  sacrorum  curam:  ita  vicissim  populum  hortatur  ad  sacras  oblationes  fideliter  persolvendas,  ubi  victum  Levitarum  pronunciat  sua  esse  sacrificia.