39:516  et  qualis  coepisset  esse  a  suo  lapsu.  Sed  quia  hoc  prophetae  testimonium  peculiariter  convenit  ecclesiae  Dei,  sciamus  nos  Ierosolymae  exemplo  doceri,  ubi  Deus  prosequitur  erga  nos  suam  liberalitatem,  aestimanda  esse  eius  dona  pro  merito,  ne  sero  tandem  incipiamus  agnoscere  quam  desiderabilis  fuerit  nostra  conditio.  Ergo  in  summa  hic  perstringit  Ieremias  socordiam  populi,  qui  non  agnovit  quam  optabilis  esset  sua  conditio,  donec  privatus  et  spoliatus  fuit  omnibus  bonis.  Ideo  dicit  a  diebus  antiquis:  quibus  verbis  forte  significat  diuturnum  cursum  beneficentiae  Dei.  Neque  enim  exiguo  tempore  Deus  liberalis  fuerat  erga  populum  illum,  sed  continua  serie  prosequutus  fuerat  eundem  favorem.  Quum  ergo  cecidit  populus,  tunc  gravior  fuit  miseria  quum  tam  longo  tempore  floruisset.  Addit,  viderunt  hostes,  riserunt  super  sabbato  eius.  Quanquam  neque  displicet  nomen  cessationis.  Porro  qui  vertunt  otium,  vel  corrumpunt,  vel  nimis  obscurant  sensum  prophetae.  Et  in  voce  cessationis  etiam  suberit  ironia.  Neque  enim  riserunt  hostes  simpliciter  cessationem,  sed  cum  ludibrio,  quia  tunc  data  illis  fuit  materia  subsannandae  religionis.  Scimus  sabbata  populi  iudaici  semper  odiosa  fuisse  profanis  gentibus,  et  vexata  etiam  multis  probris.  Nam  per  ignominiam  vocarunt  Iudaeos  sabbatarios.  Et  quum  volunt  ignominiose  traducere  totum  cultum  Dei,  qui  sub  lege  vigebat,  nominant  sabbata.  Minime  igitur  dubium  est  quin  gentes  probrose  obiecerint  Iudaeis,  ipsos  sabbatum  agere,  Ecce,  nunc  tempus  est  colendi  Dei.  Et  videmus  etiam  Deum  perstringere  Iudaeos  eadem  ironia  quum  dicit  (Levit.  26,  43),  Donec  terra  sabbata  sua  peregerit.  Quum  enim  Iudaeis  liceret  per  otium,  ubi  nulli  hostes  molesti  erant,  cultum  Dei  servare,  violarunt  sabbata  impio  contemptu.  Quum  ergo  Dei  cultus  ita  indigne  fuisset  ab  ipsis  neglectus,  Deus  dicit,  Terra  ipsa  sabbatum  colet  loco  vestro:  quomodo?  quia  neque  arabitur,  neque  frugem  feret  :  cessationem  illam  vocat  Deus  sabbatum,  sed  non  sine  ironia.  Mordet  enim  Iudaeos  quoniam  sabbata  violaverant,  quemadmodum  Ieremias  etiam  cap.  17  illis  obiecit.  Ergo  mihi  probabile  est  iacta  fuisse  probra  ab  hostibus  contra  Iudaeos,  quod  liceret  illis  longum  sabbatum  et  continuum  agere,  quum  scilicet  urbs  ipsorum  esset  deserta,  et  quum  nemo  illic  habitaret.  Frigidum  enim  illud  esset,  hostes  risisse  super  cessatione  eius.  Usus  procul  dubio  fuisset  alia  voce  propheta,  nisi  propositum  ei  fuisset  notare  blasphemiam  hostium  adversus  cultum  Dei.  Hostes  ergo  viderunt,  et  riserunt  super  eius  cessatione,  sed  quam  vocarunt  probrose  sabbatariam.  Sequitur,  8.  Peccatum  peccavit  Ierusalem  (hoc  est,  scelerate  egit),  propterea  in  migrationem  (vel  commotionem)  facta  est  (hoc  est,  reddita  fuit  instabilis):  om-