37:514  feliciter  agebas  sub  mea  gubernatione:  et  interea  ego  te  retinere  mea  bonitate  non  potui,  quum  te  suaviter  foverem,  quum  sentires  nihil  tibi  esse  melius  quam  degere  sub  meo  praesidio  :  voluisti  tamen  transire  ad  idola.  Nunc  quae  tibi  excusatio,  vel  quisnam  praetextus  superest?  Ergo  videmus  amplificari  populi  crimen,  eo  quod  nulla  tentatione  impulsus  fuerit,  ut  deficeret  a  Deo  suo,  sed  mera  perfidia  se  addixerit  idolis.  Et  sequitur  confirmatio  illius  sententiae,  18.  Et  nunc  quid  tibi  ad  viam  Aegypti,  ut  bibas  aquas  Nili?  et  quid  tibi  ad  viam  Assur,  ut  bibas  aquam  fluminis?  (nempe  Euphratis).  Quemadmodum  nunc  attigi,  confirmat  propheta  quod  dixi,  nempe  populum  non  posse  coniicere  causam  malorum  alio  quoniam  sibi  imputare  debeat  quidquid  patitur.  Et  tamen  simul  duplicatur  crimen,  quod  scilicet  populus  circumspiciat  huc  atque  illuc  ad  vana  remedia,  et  ita  accumulet  sibi  novas  pernicies.  Nam  debuerat  agnoscere  non  aliud  esse  remedium  malis,  nisi  ut  placaret  Deum.  Si,  exempli  gratia,  quispiam  aegrotus  agnoscat  morbi  sui  causam,  et  postea  loco  remedii  solatium  aliquod  inane  sibi  confingat  adversum  suae  sanitati,  nonne  dignus  iudicabitur,  qui  pereat,  quando  remedia  sponte  aspernatur,  et  sese  oblectat  fallacibus  solatiis?  Idem  nunc  reprehendit  Ieremias  in  populo  israelitico:  Si  inquiras  diligenter,  inquit,  unde  tot  tibi  miseriae,  reperies  non  posse  mihi  adscribi,  sed  tuis  peccatis.  Nunc  ergo  quid  agendum  tibi  erat?  quodnam  remedium  quaerendum,  nisi  ut  te  mihi  reconciliares?  ut  peteres  a  me  veniam?  ut  operam  dares  corrigendae  tuae  malitiae,  sic  protinus  sanarem  mala  tua,  et  agnosceres  me  esse  optimum  medicum  si  ad  me  venires:  quid  autem  nunc  tu  contra  agis?  discurris  ad  vana  solatia,  confugis  nunc  ad  Aegyptum,  nunc  ad  Assyriam:  atqui  tu  nihil  proficies  his  modis.  Nunc  tenemus  consilium  prophetae.  Postquam  enim  populum  convicit  impietatis,  et  ostendit  non  posse  adscribi  mala  quae  patiebatur,  vel  Deo,  vel  fortunae,  vel  aliis  causis,  nunc  ostendit  hoc  fuisse  unicum  remedium,  et  optimam  viam  salutis,  si  cum  Deo  rediisset  in  gratiam.  Hoc  autem  fuit  signum  desperatae  amentiae,  quum  transcurrit  nunc  in  Aegyptum,  nunc  in  Assyriam.  Haec  autem  obiurgatio  pendet  ex  historia.  Nam  populus  nunc  habebat  Assyrios  sibi  infestos,  nunc  Aegyptios:  fuerunt  enim  variae  mutationes:  et  Deus  usus  est  etiam  diversis  flagellis,  quo  melius  expergefaceret  socordiam  illius  populi,  nunc  sibilavit  Aegyptiis  quemadmodum  postea  videbimus,  nunc  tuba  cecinit  in  Assyria,  ut  scirent  Israelitae  nunquam  se  fore  quietos,  nisi  tranquille  agerent  sub  Dei  imperio.  Atqui  his  omnibus  posthabitis,  tanta  fuit  populi  33