39:512  caeremoniI8,  quia  Daniel  non  destitit  Deum  precari,  et  exauditus  fuit  in  illo  exsilio  non  minus,  quam  si  venisset  ad  sacrificia  cum  pompa  solenni,  ut  in  templo  offerret:  hoc  quidem  verum  est,  sed  quoniam  non  frustra  instituit  Deus  haec  exercitia  pietatis,  ideo  propheta  a  signis  rem  ipsam  demonstrat.  Quoniam  ergo  dies  festi  testimonium  erant  Dei  gratiae  perinde  ac  si  sublato  vexillo  vocati  fuissent  Iudaei,  et  Deus  illic  medius  inter  ipsos  apparuisset:  ideo  ab  ipsis  externis  symbolis  propheta  ostendit  cultum  Dei  quodammodo  intercidisse.  Portae  eius  sunt  solitariae,  aut  vastationes,  sacerdotes  in  luctu,  virgines  in  afflictione,  ipsa  est  in  amaritudine.  Hic  autem  locus  admonet,  quum  Deus  ecclesiam  suam  affligit,  quamvis  miserum  sit  videre  iugulari  homines  in*  noxios,  promiscue  fundi  sanguinem,  occidi  sine  discrimine  sexus  vel  aetatis  pueros  et  feminas,  quamvis  etiam  triste  sit  spectaculum  domos  spoliari  et  diripi,  et  vastari  agros,  et  omnia  deformari,  tamen  si  haec  omnia  conferantur  ad  interitum  cultus  Dei,  locus,  inquam,  hic  admonet  debere  nobis  videri  levia.  Etsi  David  tantopere  deplorat  (Psal.  42,  5)  suam  conditionem,  quia  a  templo  exsulet,  nec  ducat  catervas  pro  more  suo,  ubi  non  tantum  unus  homo  e  sanctuario  Dei  eiectus  fuit,  sed  ubi  ipsum  sanctuarium  fuit  eversum  una  cum  altari,  nulla  sacrificia,  nullae  gratiarum  actiones,  nullae  laudes,  denique  nulla  invocatio,  hoc  certe  longe  fuit  acerbius.  Ergo  diligenter  notanda  est  haec  prophetae  lamentatio  quum  dicit  vias  Sionis  lugere,  quod  nemo  ad  solennitatem  ascendat.  Quod  sequitur  leviter  praetereo:  postea  longius  insistam  in  ipsis  rebus  ubi  progressi  fuerimus  ad  finem  usque  narrationis.  5.  Fuerunt  inimici  eius  in  caput:  hostes  eius  feliciter  egerunt,  fuerunt  in  pace  (ibtV)  quia  Iehovah  afflixit  eam  super  magnitudine  scelerum  eius:  parvuli  eius  profecti  sunt  in  exsilium  coram  adversario.  Primo  dicit  inimicos  factos  in  caput:  qua  voce  haud  dubie  intelligit  imperium:  et  hanc  loquendi  formam  sumpsit  a  Mose.  Sic  enim  habetur  Deut.  28  (v.  13):  Eris  in  caput,  et  non  in  caudam  eius,  in  loco  sublimi,  non  obscuro.  Dicit  ergo  inimicos  fuisse  in  caput,  hoc  est,  dominatos  fuisse.  Et  subaudiendum  est  illud  antitheton,  quod  scilicet  fuerint  in  caudam,  hoc  est,  fuerint  quasi  sub  pedibus  hostium  suorum.  Dicit,  rursus  hostes  feliciter  egisse,  nempe,  quia  Iehovah  afflixerit  eam.  Hic  iam  non  lamentatur  pro  vulgari  more,  hoc  est,  ut  solent  profani  homines:  sed  admiscet  doctrinam  luctui  suo:  et  ostendit  Deum  in  illis  rebus  adeo  turbulentis  et  confusis  apparere  iustum  iudicem.  Revocat  igitur  eos  ad  considerandam  Dei  manum  ubi  dicit  ideo  feliciter  hostes  agere,  quia  Deus  ipsam  afflixerit.