35:512  de  ce,  qui  est  ici  dit:  ie  laisse  pour  le  present  a  parler  de  la  beaute  des  filles  de  Iob:  car  en  somme  l'Escriture  a  voulu  signifier,  que  selon  le  monde  Dieu  l'a  fait  prosperer,  tellement  que  nous  voyons  a  l'oeil  qu'il  estoit  favorise  de  Dieu,  voire  outre  l'ordre  commun.  Et  ne  trouvons  point  estrange,  que  pour  ce  teinps-la  Dieu  ait  voulu  par  ceste  prosperite  terrienne  et  caduque  declarer  son  amour  envers  les  fideles:  car  il  n'y  avoit  point  alors  telle  revelation  de  la  vie  celeste  comme  elle  est  auiourd'hui  en  l'Evangile:  Iesus  Christ  n'estoit  point  manifeste,  lequel  est  descendu  ici  bas  pour  nous  attirer  la  haut:  lequel  a  vestu  nostre  chair,  afin  de  nous  monstrer  que  Dieu  habite  en  nous,  et  qu'il  nous  a  conionts  a  sa  gloire  et  a  son  immortalite.  Ces  choses-la  n'estoyent  point  encores:  il  a  donc  fallu  que  les  fideles  fussent  traittez  en  partie  comme  des  petits  enfans.  Et  voila  pourquoi  quand  il  est  parle  des  Peres  anciens  en  l'Escriture:  notamment  il  est  dit,  que  Dieu  les  a  benis  en  lignee,  en  bestial,  en  possessions,  et  choses  semblables,  et  mesmes  en  longue  vie.  Et  pourquoi?  Il  falloit  qu'ils  fussent  aidez  par  ces  moyens-la,  en  attendant  que  la  vie  celeste  nous  fust  revelee:  comme  nostre  Seigneur  Iesus  nous  a  ouvert  la  porte  de  paradis  a  sa  venue,  afin  de  nous  faire  monter  la  haut  avec  lui.  Si  donc  maintenant  Dieu  ne  nous  fait  point  tant  prosperer  selon  le  monde,  nous  ne  devons  point  estre  faschez  pour  cela:  car  nostre  condition  n'est  pas  pire  que  celle  des  Peres  anciens:  nous  avons  une  recompense  beaucoup  meilleure  qui  nous  doit  consoler.  Pour  exemple  prenons  seulement  ce  qui  est  dit  de  la  longue  vie.  Dieu  a  beaucoup  estime  en  sa  Loi  ceste  longue  vie  qu'il  donnoit  a  ses  fideles.  Or  cependant  il  y  a  eu  des  incredules  et  reprouvez  du  tout  qui  ont  vescu  longuement.  Il  ne  nous  faut  point  donc  la  arrester  en  premier  lieu  puis  que  c'est  un  bien  qui  peut  estre  commun  tant  aux  ennemis  de  Dieu  qu'a  tous  fideles:  ce  n'est  pas  le  souverain  bien,  la  vraye  felicite  et  parfaite:  il  s'en  faut  beancoup.  Mais  il  nous  faut  aussi  adiouster  le  second  article:  c'est  que  les  Peres  anciens  ne  savoyent  pas  encores  en  telle  perfection  que  nous,  que  Dieu  leur  avoit  prepare  leur  heritage  au  ciel.  Il  est  vrai  qu'ils  en  avoyent  bien  quelque  goust,  et  la  foi  nous  est  commune  avec  eux:  mais  tant  y  a  encores  qu'ils  n'en  ont  point  eu  une  telle  declaration  comme  elle  nous  est  manifestee  en  nostre  Seigneur  Iesus  Christ.  Il  a  donc  fallu  que  Dieu  les  laissast  longuement  vivre,  et  qu'il  les  fist  profiter  par  longs  exercices  en  ce  monde.  Yoila  pourquoi  Iob  a  eu  longue  vie.  Auiourd'hui  nostre  vie  est  plus  courte:  voire  d'autant  que  Iesus  Christ  nous  est  apparu,  et  nous  a  monstre  que  nous  sommes  estrangers  en  ce  monde,  pour  courir  a  cest  heritage  qui  nous  a  este  acquis  par  son  sang.  Ce