40:511  511  PRAELECTIONES  512  quendi  formis  significat  spiritus  sanctus  placari  vere  Deum,  ubi  homines  sincera  fide  et  poenitentia  ad  eum  accedunt  et  cupiunt  reconciliari,  ingenua  confessione  suppliciter  deprecantur  veniam:  respiciunt  denique  in  Christum:  hic  est  odor  quem  Moses  passim  docet  fuisse  Deo  suavem.  Sicuti  autem  suaviter  olebat  suffitus  legalis:  ita  etiam  foetidi  erant  alii  omnes  suffitus,  quemadmodum  ante  visum  fuit.  Nihil  ergo  hic  novum  addit  propheta,  sed  confirmat  superiorem  doctrinam,  quod  scilicet  Deus  oblectabitur  puro  et  sincero  fidelium  cultu,  ubi  nihil  tentabunt  nisi  ex  ipsius  lege.  Postquam,  inquit,  eduxero  vos  e  populis,  et  collegero  vos  ex  terris  per  quas  dispersi  fueritis.  Eadem  nunc  verba  repetit  quae  ante  vidimus,  sed  in  alium  sensum  et  finem:  quia  dum  similiter  redemit  tam  hypocritas,  quam  suos  electos,  hypocritis  nihil  profuit  data  libertas:  quia  ubicunque  degerent,  fuit  illis  sua  statio  quasi  desertum  ,  ut  in  medio  sinu  terrae  Chanaan  essent  nihilominus  exsules,  vitaque  eorum  esset  erratica,  quoniam  non  potiebantur  promissa  sibi  haereditate:  in  longinquis  etiam  regionibus  erant  quasi  vagi  in  deserto.  Nam  utcunque  habitarent  in  magna  hominum  frequentia,  tamen  conditio  ipsorum  talis  erat,  ut  merito  Deus  ante  minatus  fuerit  illos  fore  in  deserto  gentium  usque  ad  mortem.  Nunc  autem  quum  de  electis  et  fidelibus  loquitur,  discrimen  ponit  inter  eos  et  hypocritas.  Nam  poterat  alioqui  moveri  quaestio,  quum  in  speciem  omnes  essent  pares,  quorsum  tenderet  ista  promissio,  alios  fore  exsules,  alios  autem  venturos  in  suam  haereditatem?  Nam  Daniel  nunquam  reversus  est  in  patriam  :  nec  dubium  est  alios  quoque  pios  Dei  cultores  simul  fuisse  retentos.  Scimus  autem  quanta  colluvies  in  Iudaeam  redierit  quum  edicto  Cyri  id  fuit  permissum.  Nam  singuli  postea  attenti  fuerunt  ad  privata  negotia:  templum  fuit  neglectum:  fraudatus  fuit  Deus  primitiis  et  oblationibus  :  duxerunt  alienas  uxores:  deinde  polygamia  grassata  fuit  etiam  inter  ipsos  sacrificos.  Iam  vidimus  quam  acriter  et  severe  in  ipsos  tres  ultimi  prophetae  invehantur.  Quia  ergo  multi  reversi  sunt  in  terram  Chanaan,  qui  tamen  non  mutarunt  ingenium,  et  quibus  satius  fuisset  manere  in  Chaldaea:  hac  ratione  propheta  sermonem  dirigit  ad  electos,  et  dicit  non  tantum  fore  reduces,  sed  ubi  fuerint  quasi  postliminio  restituti,  cultum  ipsorum  fore  gratum  Deo  in  terra.  Quum  ergo  eduxero  vos,  inquit,  tunc  sanctificabor  in  vobis  in  oculis  gentium.  Sanctificatus  etiam  quodammodo  fuit  Deus  in  reprobis,  quia  specimen  illud  fuit  illustre  potentiae  eius,  quum  victis  Chaldaeis  rursus  erectum  fuit  templum.  Sed  hic  propheta,  quemadmodum  dixi,  electos  discernit  a  reprobis,  quia  peculiari  modo  sanctificatus  fuit  Deus  in  illis,  quum  scilicet  iterum  emersit  nova  ecclesia,  in  qua  florebat  pietas,  vera  religio,  et  integritas