25:511  511  COMMENTARIUS  IN  IOSUE  CAP.  XI.  512  paterfamilias  nihil  quod  ad  illius  utilitatem  faceret,  neglexit,  vel  omisit.  19.  Non  fuit  urbs  quae  pacem.  Huic  sententiae  primo  intuitu  repugnat  quod  passim  occurrit  apud  Mosen,  ne  percutiant  Israelitae  foedus  cum  illis  gentibus,  vel  ullas  pacis  conditiones  admittant:  sed  funditus  perdant  et  deleant  sobolem  et  nomen  (Exod.  23,  32.  et  Deut.  7,  2).  Quum  ergo  exclusi  essent  ab  omni  pactione,  ac  frustra  de  pace  acturi  essent:  absurdum  est  eorum  contumaciae  imputari  quem  liberum  non  erat  deprecari  interitum.  Fingamus  enim  legatos  obviam  misisse  cum  ramis  olearum  :  ad  pacificandum  fuisse  intentos.  Excepisset  protinus  Iosue,  sibi  fas  non  esse  transigere,  quia  Deus  vetuerat.  Quare  si  centies  bellum  effugere  tentassent,  pereundum  erat  nihilominus.  Cur  ergo  vitio  illis  vertitur,  quod  pacem  non  petierint?  Quasi  vero  necessitate  compulsi  non  fuerint  ad  pugnandum,  postquam  videbant  cum  implacabili  populo  esse  negotium.  Quod  si  aliter  agere  liberum  non  fuit,  iniuste  illis  culpa  adscribitur,  quod  coacti  se  hostium  furori  opposuerint.  Respondeo,  quamvis  clementer  eos  recipere  veriti  fuerint  Israelitae,  quo  tamen  iustum  esset  bellum,  hostiliter  fuisse  exceptos.  Atque  id  arcana  Dei  providentia  mirabiliter  gubernatum  fuit,  ut  exitio  addicti  ultro  se  offerrent,  et  Israelitas  lacessendo  perniciem  sibi  accerserent.  Deus  itaque  qui  veniam  illis  negari  iusserat,  idem  eos  ad  caecum  furorem  impulit,  ne  locum  darent  misericordiae.  Atque  hac  in  parte  populum  non  oportuit  nimis  sagacem  esse  vel  curiosum.  Nam  quum  ab  una  parte  interdiceret  Deus,  ne  ad  ullum  foedus  descenderent:  et  simul  tamen  nollet  hostiliter  saevire  nisi  essent  provocati,  nimis  anxia  disceptatio  valde  turbasset  eorum  animos.  Quare  una  ratio  expediendae  perplexitatis  fuit,  curam  illam  in  Dei  sinum  reiicere.  Et  ipse  pro  sua  incomprehensibili  sapientia  prospexit,  ne  quo  obstaculo,  ubi  ad  rem  ventum  est,  abrumperetur  cursus  populi.  Sic  reges  trans  Iordanem  quum  priores  arma  sumpsissent,  merito  dederunt  suae  temeritatis  poenas.  Neque  enim  infestis  armis  eos  aggressi  sunt  Israelitae  donnee  essent  provocati.  Eodem  quoque  modo  cives  Iericho  quum  portas  clausissent,  bellum  ipsis  indixerunt.  Similis  aliorum  ratio,  qui  sua  contumacia  causam  pugnandi  dederunt  Israelitis.  Nunc  apparet  quam  apte  inter  se  conveniant,  Deum  mandasse  Mosi,  ut  perderentur  gentes  quas  destinaverat  ad  interitum:  ideoque  viam  patefecisse  suo  decreto,  ubi  reprobos  obduravit.  Primo  itaque  in  gradu  locatur  Dei  voluntas,  ut  emineat  tanquam  praecipua  causa.  Nam  quia  ad  cumulum  pervenerat  illorum  iniquitas,  statuit  eos  delere.  Inde  fluxit  datum  Mosi  praeceptum:  quod  tamen  effectu  caruisset,  nisi  eorum  qui  perdendi  erant  pertinacia  et  obstinatione  armatus  esset  populus  ad  exsequen-