39:510  intelligit  propheta,  ex  multis  amicis  neminem  fuisse  qui  Ierosolymam  solari  conatus  fuerit  in  suis  miseriis.  Quanquam  dubium  non  est  quin  oblique  perstringat  Ierosolymam:  et  quum  nominat  D'QnK  intelligit  amatores,  sicuti  quibusdam  in  locis  vidimus.  Quia  enim  perversis  foederibus  putabant  se  fore  salvos,  prophetae  dicunt  similes  fuisse  meretricibus,  quae  passim  se  prostituunt,  et  faciunt  quaestum  ex  sua  libidine,  et  alliciunt  hinc  inde  amatores.  Rectum  itaque  est,  ut  propheta  hoc  etiam  loco  insimulet  Iudaeos  illius  pravitatis,  quod  scilicet  sibi  conciliaverant  nunc  Aegyptios,  nunc  Assyrios,  quemadmodum  mulier  impudica  non  acquiescit  in  uno  marito,  sed  attrahit  hinc  inde  scortatores.  Quidquid  sit,  non  dubium  est  quin  per  amicos  intelligat  foederatos:  quinam  autem  illi  erant?  nempe  quibuscum  se  coniunxerant  Iudaei,  Deo  contempto:  quia  satis  admoniti  fuerant  a  prophetis,  ne  se  implicarent  ulla  societate  gentium.  Interea  vero  exasperat  simul  atrocitatem  rei  Ieremias  quum  dicit  neminem  fuisse  consolatorem  Ierosolymae  ex  omnibus  amicis  eius,  quia  omnes  socii  perfide  egerint.  Sequitur,  3.  Migravit  (tanquam  in  exsilium)  Iehudah  prae  afflictione,  et  prae  magnitudine  servitutis  ipsa  sedet  in  gentibus  (ad  verbum,  sedens  in  gentibus),  non  invenit  requiem  (vel,  in  praesenti  tempore,  non  invenit),  omnes  apprehensores  eius  apprehenderunt  eam  inter  angustias.  Hoc  male  accipiunt  interpretes,  meo  iudicio,  de  ipsa  captivitate  :  potius  enim  significat  propheta  dispersos  fuisse  Iudaeos,  et  captasse  latebras,  quum  saepius  oppressi  fuissent  hostium  suorum  tyrannide:  deinde  gradatim  progreditur  ad  exsilium.  Neque  enim  omnia  simul  dicere  potuit.  Notandus  igitur  est  ordo  ipse  loquendi.  Antequam  ergo  exsilium  ipsum  defleat,  dicit  Iehudah  fuisse  dispersum,  quia  multi  quum  fugerent  hostium  saevitiam,  profecti  sunt  in  voluntarium  exsilium.  Iam  ante  vidimus  multos  latuisse  apud  Moabitas  :  nec  dubium  est  quin  multi  in  Aegyptum  etiam  profecti  essent:  denique  nulla  erat  regio,  in  qua  non  essent  aliqui  ex  Iudaeis  profugi.  Hic  ergo  genuinus  est  prophetae  sensus,  nempe  Iudaeos  migrasse,  hoc  est,  relicta  patria,  fugisse  in  alienas  regiones,  quia  oppressi  erant  miseriis  et  crudeli  servitute.  Quidam  hoc  passive  accipiunt,  quod  Iehudah  migraverit,  quoniam  inhumaniter  oppresserit  servos  suos.  Sed  videor  mihi  coniicere  quid  ipsos  fefellerit:  putabant  hoc  dici  deexsilio:  deinde  error  peperit  errorem.  Absurda  enim  esset  sententia,  Iudaeos  migrasse  in  exsilium  prae  afflictione,  et  migrasse  sponte.  Scimus  enim  violenter  abductos  a  Chaldaeis.  Non  ergo  sponte  migrarunt.  Quum  haec  duo  simul  non  possent  connectere,  putarunt  hic  obiici  Iudaeis  crudelitatem,