37:510  Si  placet  hic  reddi  causam,  cur  coelos  mirari  et  expavescere  iusserit  propheta,  vertendum  erit,  quia  duo  mala  fecit  populus  meus.  Sed  potius  versum,  quem  nunc  exposui,  existimo  pendere  a  superioribus  sententiis.  Dixerat  propheta:  Ite  in  terras  longinquas,  videte  an  ulla  gens  mutaverit  deos  suos:  et  tamen  sunt  mera  figmenta.  Puto  igitur  hanc  sententiam  exclamatione  finiri,  quum  nuper  dixit  propheta,  Coeli  obstupescite.  Iam  sequitur,  Certe  duo  mala  fecit  populus  meus,  nempe,  quod  me  dereliquerity  deinde,  quod  sibi  asciverit  falsos  deos.  Si  quis  relicto  veteri  amico  ad  novum  transeat,  hoc  est  iniustum  et  turpe.  Sed  ubi  nulla  est  compensatio,  cum  stultitia  et  levitate  simul  coniunctus  est  quidam  furor.  Si  ego  sperno  quod  sentio  mihi  esse  utile,  et  amplector  quod  intelligo  fore  mihi  noxium,  nonne  haec  optio  prodit  amentiam?  Hoc  ergo  nunc  significat  propheta  quum  dicit,  populum  non  in  eo  tantum  peccasse,  quod  desciverit  a  vero  Deo,  sed  etiam  quod  absque  compensatione  transierit  ad  idola,  quae  nihil  conferre  utilitatis  poterant.  Dicit  duo  mala  fecisse,  prius  malum  est,  quod  Deum  reliquerit:  alterum  vero,  quod  defecerit  ad  falsos  deos  et  imaginarios:  sed  quo  gravius  crimen  amplificet,  utitur  similitudine,  ac  dicit  Deum  esse  fontem  aquarum  viventium:  idola  autem  comparat  cisternis  perforalis  et  confractis,  quae  aquam  non  continent.  Si  quis  relicto  vivo  fonte  appeteret  cisternam,  esset  magna  stultitia:  nam  cisternae  aridae  sunt,  nisi  aliunde  aqua  proveniat:  fons  autem  ex  se  habet  suam  scaturiginem:  deinde  ubi  est  vena  quae  perpetuo  fluit,  et  perennis  aquarum  cursus,  aqua  multo  est  salubrior  et  melior.  Aquae  pluviae  dum  cadunt  in  cisternas,  nunquam  ita  sunt  salubres,  ut  quae  fluunt  ex  propria  et  nativa  vena.  Quid  autem  ubi  ne  aquarum  quidem  sunt  receptacula,  sed  rimis  plenae  intus  sunt  inanes?  Hinc  ergo  Deus  coarguit  populi  dementiam,  Quod  ipse  fuerit  relictus,  quum  tamen  esset  fons,  deinde  fons  aquarum  viventium:  deinde,  quod  populus  appetiverit  res  nihili  quum  amplexus  est  sua  idola.  Quid  enim  reperietur  in  idolis?  figura  quaedam.  Superstitiosi  enim  homines  existimant  se  non  ludere  operam,  dum  colunt  falsos  deos,  et  sperant  inde  aliquid  mercedis.  Sunt  igitur  aliquae  formae  in  falsis  religionibus;  et  ideo  propheta  comparat  falsos  deos  puteis,  propter  cavitatem:  sed  interea  nulla  est  aquarum  gutta:  sunt  enim  cisternae  fractae  et  dissipatae.  Iam  intelligimus  quid  sibi  velit  propheta,  nempe  non  posse  nos  eximi  a  reatu,  ubi  relinquimus  verum  et  unicum  Deum,  quia  in  eo  posita  est  nobis  bonorum  omnium  plenitudo:  inde  haurire  ad  satietatem  licet.  Quum  ergo  spernimus  Dei  liberalitatem,  quae  nobis  potest  sufficere  ad  omnes  felicitatis  nostrae  partes  ac  numeros,  quanta  est  ista  ingratitudo  et  pravitas?  atqui  Deus  sui  semper  manet  similis.  Si  ergo  iure