32:510  sa  Parole?  En  cela  le  proverbe  commun  est  pratique  quand  on  dit,  Qu'un  fol  ne  doute  de  rien.  Et  nous  le  monstrons  assez:  car  beaucoup  n'estiment  rien  l'Escriture  saincte,  et  leur  semble  que  ce  quils  y  lisent  est  par  trop  commun:  mais  c'est  pource  qu'ils  ne  scavent  que  c'est,  et  qu'ils  ne  cognoissent  point  les  grans  thresors  qui  sont  la  cachez.  Mais  ceux  qui  une  fois  auront  entendu  quelle  est  la  maieste  de  Dieu,  qui  se  monstre  et  se  declaire  la,  qui  verront  ou  c'est  que  Dieu  nous  appelle  et  convie,  qui  cognoistront  la  grandeur  et  douceur  des  promesses  qui  nous  sont  la  offertes:  ceux-la  diront  avec  David,  Seigneur  ta  Loy  est  admirable.  Et  ainsi  par  consequent,  ils  demanderont  que  leurs  yeux  soyent  illuminez,  confessans  qu'ils  sont  aveugles,  iusques  a  ce  que  Dieu  ait  besongne  en  eux  par  son  S.  Esprit.  Or  il  s'ensuit,  Ie  suis  estranger  en  la  terre,  ne  cache  point  tes  commandemens  de  moy.  Quand  David  adiouste  ce  verset,  il  veut  confermer  le  propos  qu'il  avoit  desia  tenu  auparavant:  c'est  ascavoir  qu'il  ne  demandoit  point  simplement  a  vivre,  comme  si  sa  vie  luy  eust  este  precieuse  sans  autre  regard:  mais  il  tendoit  plus  loing.  Il  dit  donc  maintenant,  Ie  suis  estranger  au  monde:  ainsi  ne  cache  point  tes  commandemens  de  moy.  Ceux  qui  font  yci  leur  nid  perpetuel  par  imagination,  et  qui  pensent  avoir  leur  paradis  au  monde:  ceux-la  n'ont  que  faire  des  commandemens  de  Dieu  pour  leur  salut.  Car  c'est  assez  qu'ils  ayent  a  boire  et  a  manger  pour  gourmander,  qu'ils  ayent  leur  voluptez  et  delices,  qu'on  les  honnore,  .qu'ils  soyent  en  credit:  voyla  tout  ce  qu'ils  demandent.  Voire:  car  ils  ne  montent  point  plus*  haut  que  ceste  Vie  corruptible  et  caduque.  Ceux-la  donc  ne  sont  pas  beaucoup  tormentez,  et  n'ont  nul  soucy  des  commandemens  de  Dieu,  quand  ils  en  seroyent  privez,  ce  leur  seroit  tout  un.  Quand  un  avaricieux,  un  paillard,  un  yvrongne,  un  ambicieux  n'orroit  iamais  un  seul  mot  de  predication:  qu'on  ne  luy  parlast  ne  de  Dieu,  ne  de  Chrestiente,  ne  de  la  vie  eternelle,  il  ne  laisseroit  pas  d'aller  son  train.  Et  mesme,  ce  leur  est  comme  ennuy  et  propos  de  melancolie  que  d'ouyr  parler  de  Dieu,  ils  voudroyent  bien  qu'on  ne  leur  en  fist  iamais  mention  ne  nouvelles.  Ce  n'est  pas  donc  sans  cause  que  David  requerant  de  n'estre  point  prive  des  commandemens  de  Dieu,  met  ceste  raison  yci:  c'est  ascavoir,  d'autant  qu'il  est  estranger  en  la  terre.  Comme  s'il  disoit,  Si  ie  n'avoye  autre  regard  qu'a  la  vie  presente,  ie  seroye  malheureux,  et  vaudroit  mieux  que  ma  mere  m'eust  avorte,  que  ie  fusse  abysme  cent  fois.  Et  pourquoy?  car  nous  ne  faisons  que  passer  par  ce  monde:  nous  tendons  a  une  vie  plus  excellente:  comme  c'est  la  aussi  qu'est  toute  nostre  esperance.  Puis  qu'ainsi  est  donc  que  ie  suis  estranger  au  monde,  Seigneur,  ne