41:51  51  PRAELECTIONES  52  etiam  sequutus  est  Octavius,  et  post  eum  Tiberius.  Nemo  enim  ex  Caesaribus,  nisi  consul  esset,  ausus  fuit  tribunal  conscendere:  sed  habuit  suum  subsellium:  quanquam  illinc  imperabat  aliis  omnibus.  Non  mirum  igitur  est,  si  Daniel  vocet  monarchiam  Iulii  Caesaris  et  aliorum  'parvum  cornu:  quia  non  erat  tantus  splendor  vel  dignitas,  ut  obrueret  illam  amplitudinem  senatus:  sed  quum  senatus  retineret  nomen  et  speciem  dignitatis,  unus  tamen  potitus  est  imperio,  sicuti  satis  notum  est.  Dicit  ergo  hoc  parvum  cornu  fuisse  exortum  inter  decem  alia.  Quod  subiicit  tria  ex  illis  decem  fuisse  ablata,  non  possem  nunc  exponere.  Restant  nobis  tria  explicanda  in  expositione  quartae  bestiae.  Primum  est,  quod  ablata  fuerint  tria  cornua  a  facie  illius:  deinde,  quod  cornu  parvum  (quod  exortum  erat  inter  decem)  apparuerit  cum  oculis  humanis:  tertio,  quod  loquutum  sit  magnifice^  vel,  quod  protulerit  verba  grandia.  Quod  ad  tria  cornua  spectat,  satis  liquebit  ex  testimonio  angeli  tres  esse  reges:  non  quod  hoc  debeat  referri  ad  personas,  quemadmodum  heri  perstrinxi:  sed  quia  Romani  mittere  solebant  in  singulas  provincias  quasi  reges,  qui  summo  imperio  illic  potirentur.  Qui  extendunt  hoc  vaticinium  ad  finem  regni  Christi,  putant  notari  dissipationem,  quae  accidit  trecentis  vel  etiam  quingentis  annis  post  Christi  mortem:  sed  longe  falluntur.  Certum  quidem  est,  collapsum  fuisse  totum  robur  romani  imperii,  et  paulatim  discerptas  fuisse  provincias,  ut  esset  quasi  mutilum  corpus,  sed  heri  ostendimus  non  posse  hoc  oraculum  commode  exponi,  nisi  de  statu  ecclesiae  usque  ad  Christi  adventum  et  evangelii  promulgationem.  Eo  tempore  satis  notum  est  nihil  fuisse  detractum  ex  finibus  imperii.  Nam  Iulius  Caesar  formidabilis  erat,  non  solum  Gallis,  sed  etiam  Germanis:  deinde  in  Oriente  res  tunc  pacatae  fuerunt.  Post  eius  mortem,  quamvis  Octavius  vel  Augustus  passus  fuerit  duas  gravissimas  clades,  praesertim  sub  Quintilio  Varo,  qui  missus  in  Germaniam  fuerat  cum  valido  exercitu  :  tamen  auxit  ipse  quoque  fines  imperii,  praesertim  in  Oriente,  et  perdomuit  totam  Hispaniam,  ut  deinde  nulli  fuerint  motus.  Quum  ergo  tunc  nulla  provincia  detracta  fuerit  ab  imperio  romano,  quid  hoc  sibi  vult,  detracta  fuisse  tria  cornua  et  ablata  a  facie  bestiae?  Solutio  non  est  difficilis,  modo  notemus  hic  conferri  parvum  cornu  cum  prima  statura  bestiae.  Apparuit  igitur  bestia  cum  decem  cornibus:  quum  exortum  est  parvum  cornu,  mutata  fuit  figura  bestiae.  Dicit  igitur  propheta  partem  cornuum  fuisse  detractam:  quia  tunc  desiit  senatus  creare  proconsules.  Scimus  enim  Augustum  sibi  sumpsisse  quasdam  provincias:  et  hoc  fecisse,  ut  suo  arbitrio  constitueret  praesides,  ut  essent  praesto  robustae  copiae,  si  quis  contra  ipsum  insurgeret.