25:509  509  COMMENTARIUS  IN  IOSUE  CAP.  XI.  510  colligitur,  quod  caesi  sunt  usque  ad  Sidonem,  quae  longe  a  lacu  Merom  distabat.  Vocatur  autem  magna  ob  celebritatem  emporii  et  quia  urbs  erat  prae  aliis  populosa.  Neque  enim  comparatur  cum  alia  minore  et  eiusdem  nominis.  Hebraicum  nomen  Mozerephoth,  quod  tanquam  proprium  quidam  rer  tinent,  vertere  placuit  fervores:  quia  probabile  est  aquas  calidas  illic  ebulliisse.  Sicuti  vero  consternatio  quae  illos  in  fugam  adeo  effusam  rapuit,  palam  ostendit  arcano  Dei  instinctu  praecipites  fuisse  actos:  ita  Israelitas  qui  per  tot  discrimina  fugientes  persequi  ausi  sunt,  coelesti  virtute  certum  est  ultra  humanum  modum  fuisse  transvectos.  Laudatur  deinde  tam  abstinentia  Iosue  quam  obsequii  promptitudo.  Neque  enim  tot  equorum  et  curruum  iacturam  libenter  facturus  erat,  nisi  vicisset  Dei  timor.  Nam  quae  nostra  est  solertia  ad  excogitandos  praetextus,  obtendere  plausibile  erat  quamvis  ad  usum  militarem  eos  non  aptaret,  pretium  tamen  minime  esse  spernendum.  Atqui  non  aliud  sibi  considerandum  duxit,  nisi  quid  Deo  placeret.  Iam  quia  suis  virtutibus  adeptus  erat,  ut  populum  haberet  facilem  et  morigerum,  quod  omnes  praestiterunt  merito  in  unius  laude  ponitur.  12.  Omnes  urbes  regum  istorum.  Profligato  exercitu  regionem  populari  et  vastare,  urbes  capere  et  diripere  ceperunt.  Quum  dicitur,  urbes  quae  manebant  integrae  non  fuisse  exustas,  inde  probabilis  coniectura  elicitur,  quasdam  vi  et  impetu  fuisse  captas,  atque  ita  dirutas.  Sola  Hazor  post  expugnationem  et  sedato  ardore  fuit  incendio  consumpta  :  quia  scilicet  facem  praetulerat  inflammando  bello.  Caeterum  quod  ante  vidimus,  Iosue  non  iracundiae  fraena  laxasse  dum  omnes  a  minimo  usque  ad  maximum  interfecit,  saepius  et  clarius  hoc  loco  repetitur.  Nam  quod  nondum  expressum  fuerat  nunc  diserte  designatur:  Iosue  fideliter  defunctum  esse  suis  partibus,  quia  implevit  quidquid  Deus  per  Mosen  iniunxerat.  Perinde  ergo  fuit  ac  si  manus  suas  consecrasset  Deo,  ubi  ex  eius  mandato  gentes  illas  delevit.  Ita  tenendum  est,  quamvis  totus  mundus  nos  damnet,  sufficere  tamen  ad  nos  omni  culpa  liberandos  Deum  habere  autorem.  Interea  prudenter  expendere  convenit  quid  ferat  cuiusque  vocatio:  ne  si  quis  pro  zeli  sui  licentia  imitari  velit  Iosue,  crudelis  et  sanguinarius  iudicetur  potius  quam  severus  Dei  minister.  16.  Et  cepit  Iosue  omnem  terram  istam  montanam,  et  omnem  australem,  omnemque  terram  Gosen  et  planitiem  atque  campestria,  montem  quoque  Israel  et  planitiem  eius.  17.  A  monte  laevi  qui  assurgit  versus  Seir  usque  Baalgad  in  campo  Libani  sub  monte  Hermon:  omnes  quoque  reges  eorum  cepit,  et  percussit  eos  et  interfecit.  18.  Diebus  multis  gessit