55:508  qui  nous  est  besoing  ne  nous  defaille.  Finalement,  pour  nous  bien  gouverner  et  sainctement  avec  nostre  prochain,  est  requise  charite,  laquelle  est  nommee  la  troisiesme.  Or  il  requiert  que  toutes  ces  choses  soyent  multipliees,  en  nous  monstrant  qu'il  nous  est  bien  mestier  de  croistre  tous  les  iours  de  nostre  vie  en  nostre  Seigneur,  iusques  a.  ce  que  nous  aurons  acheve  nostre  course.  Bien  aymez  pour  la  solicitude  que  savois  de  vous  escrire  pour  vostre  commun  salut,  il  m'a  este  necessaire  de  vous  escrire:  en  vous  exhortant  que  vous  vous  efforciez  de  perseverer  en  la  Foy,  laquelle  a  este  une  fois  baillee  aux  Saincte.  Combien  que  ce  passage  pour  sa  difficulte  puisse  recevoir  divers  sens,  toutesfois  cestuy  cy  est  le  plus  certain,  comme  il  appert  de  la  raison  incontinent  suyvante:  C'est  que  pourtant  qu'il  voyoit  les  tentations  presentes,  il  pensoit  estre  expedient  d'y  obvier.  Le  sens  doncques  sera  tel  selon  nostre  intelligence.  A  cause  que  i'ay  grand'solicitude  en  mon  coeur  de  vous  admonnester  de  tout  ce  qui  appartient  au  salut  de  vous  tous,  la  necessite  requiert  maintenant  qu'en  vous  escrivant  ie  vous  exhorte  a  perseverance:  C'est  assavoir  que  vous  mettiez  toute  vostre  estude  et  vous  employez  de  toutes  voz  forces,  pour  estre  confermez  en  la  Foy,  laquelle  le  Seigneur  a  une  fois  baillee  aux  siens,  afin  que  iamais  ilz  n'en  declinent.  Voila  comment  un  serviteur  de  Dieu  doit  animer  et  encourager  les  fideles  a  bataiiler  constamment,  quand  il  voit  les  appareilz  du  diable  pour  les  opprimer.  Car  aucuns  hommes  se  sont  mis  en  avant,  lesquelz  avoyent  este  long  temps  a  preordonnez  a  telle  condemnation,  sans  piete,  ayant  transferas  la  grace  de  nostre  Dieu  en  dissolution,  et  renoncent  Dieu  le  seul  dominateur,  et  nostre  Seigneur  Iesus  Christ.