37:508  partes  mundi,  et  videte,  et  diligenter  considerate,  videte  etiam  atque  etiam:  quasi  diceret  tantum  esse  stuporem  in  Iudaeis,  ut  non  possint  expergefieri  uno  verbo,  neque  simplici  admonitione.  Haec  igitur  ratio  est  cur  iubeat  eos  sollicite  inquirere,  et  tamen  res  erat  in  medio.  Sed  quemadmodum  iam  dixi,  haec  sollicita  inquisitio  non  refertur  ad  obscuritatem  ipsius  rei,  sed  ad  damnandum  stuporem  illius  gentis  tam  perversae,  quae  sibi  tam  crassae  impietatis  conscia,  adhuc  tamen  vitiis  suis  blandiebatur.  Dicit  ergo:  Certe  transite  ad  insulas:  postea,  Videte  an  sit  sicut  hoc:  id  est,  nusquam  reperietur  tale  et  tam  exsecrabile  prodigium.  Sequitur  explicatio,  quia  scilicet  nulla  gens  mutavit  deos,  et  tamen  non  sunt  dii,  hoc  est,  religio  apud  omnes  populos  firma  est  ut  subinde  non  mutent  deos,  sed  colant  qui  traditi  sunt  per  manus  a  patribus:  Et  tamen  ipsi  non  sunt  dii,  inquit.  Si  tantum  hoc  fuisset  dictum,  nulla  gens  mutavit  deos,  non  ita  graviter  perstricta  fuisset  populi  israelitici  impietas:  sed  propheta  sumit  hoc  pro  confesso,  gentes  omnes  mero  errore  trahi  ad  deos  fictitios,  et  tamen  constanter  manere  in  errore.  Non  proponit  autem  hoc  Deus  instar  virtutis,  non  intelligit  illam  obstinationem  in  gentibus  esse  dignam  laude,  quod  non  discedant  a  suis  superstitionibus:  sed  respectu  electi  populi,  haec  constantia  potuit  videri  utcunque  laudabilis.  Nunc  ergo  videmus  hoc  complexim  legendum  esse  quum  dicit,  Quamvis  nulla  ex  gentibus  colat  verum  Deum,  tamen  religio  apud  omnes  firma  perstat:  vos  autem  me  perfide  deseruistis  :  et  non  deseruistis  figmentum  aliquod,  sed  gloriam  vestram.  Hic  opponitur  fallaciis  vanorum  deorum  gratia  Dei  quum  dicit  Populus  meus  mutavit  gloriam  suam.  Sciebat  enim  populus,  neque  tantum  edoctus  erat  per  legem,  sed  experimentis  certis  didicerat,  Deum  esse  suam  gloriam:  et  tamen  ab  ipso  descivit.  Ergo  perinde  est  ac  si  diceret  Ieremias,  Israelitis  omnes  gentes  die  ultimo  fore  iudices,  quoniam  pertinacia  illa  in  errore  ostendet  Iudaeos  eo  magis  esse  sceleratos,  quod  apostatae  desciverint  a  vero  Deo,  et  Deo  qui  virtutem  suam  illis  manifeste  demonstraverat.  Iam  si  quaerat  quispiam,  an  non  mutata  fuerit  apud  multos  populos  religio?  primum  scimus  hoc  principium  ubique  valuisse,  nempe,  ne  quid  novarent  in  religionis  forma.  Et  Xenophon  etiam  hoc  oraculum  Apollinis  magnifice  extollit,  qui  respondit  eos  deos  rite  coli,  qui  traditi  essent  a  maioribus.  Diabolus  ita  fascinaverat  omnes  populos:  nulla  novitas  placebit  Deo,  sed  contenti  estote  usitata  consuetudine,  quae  a  maioribus  ad  vos  descendit.  Hoc  igitur  principium  apud  Graecos,  et  Asiaticos,  et  in  Europa  etiam  valuit.  Ergo  ut  plurimum  verum  fuit  quod  nunc  dicit  propheta.  Scimus  autem  ubi  comparatio  aliqua  additur,  satis  esse  si  explicetur  quod  fit  ut  plurimum  eni  ib  noXbj  quemadmodum  dicit