37:506  9.  Propterea  adhuc  contendam  (vel,  disceptabo)  vobiscum,  dicit  Iehovah,  et  cum  filiis  filiorum  vestrorum  disceptabo.  Non  caret  pondere  particula  "ny,  quia  subindicat  propheta,  si  Deus  poenas  iam  ante  exegerit  de  perfidia  et  sceleribus  populi,  se  adhuc  retinere  ius  suum  integrum:  quasi  diceret,  Ne  putetis  vos  esse  defunctos  poenis  omnibus,  si  hactenus  severe  ultus  sum  scelera  patrum  vestrorum  et  obstinationem.  Nam  quum  pergatis  in  eodem  cursu,  et  nullus  sit  apud  vos  peccandi  modus,  neque  finis,  ego  etiam  non  desistam  a  iure  meo,  sed  persequar  usque  ad  extremum  et  vos,  et  filios  vestros,  et  alias  etiam  generationes.  Nunc  ergo  intelligimus  quid  velit  propheta:  nam  hoc  solenne  est  hypocritis,  crasse  reiicere  omnem  metum,  praesertim  ubi  semel  castigati  sunt  a  Domino.  Putant  enim  hoc  ei  sufficere,  quod  poenam  sumpserit  de  sceleribus.  Atqui  non  cogitant  Deum  mediocriter  punire  hominum  peccata,  ut  alios  ad  poenitentiam  invitet,  et  sic  esse  asperum  et  severum  ut  tamen  se  retineat,  quo  sit  locus  spei:  atque  ita  dum  veniam  exspectant  qui  peccarunt,  alacrius  sese  recipiant  in  viam.  Hoc  non  cogitant  hypocritae  :  sed  putant  Deum  exserere  primo  impetu  omnem  suum  rigorem,  ita  promittunt  sibi  impunitatem  in  futurum  tempus.  Exempli  gratia,  Si  Deus  castiget  urbem  aliquam,  vel  regionem  bello,  aut  peste,  aut  fame,  in  mediis  malis  aliquis  est  terror  et  anxietas,  gemunt  et  suspirant,  atque  etiam  ululant  plerique,  quos  Deus  ita  affligit.  Caeterum  simul  atque  data  est  aliqua  relaxatio,  excutiunt  iugum,  et  immemores  scelerum  suorum  iterum  ad  vomitum  redeunt  tanquam  canes.  Sic  igitur  necesse  est  hypocritis  denuntiari  quod  videmus  fieri  nunc  a  Ieremia,  nempe  Deum  sic  ulcisci  hominum  peccata,  ut  tamen  in  futurum  tempus  non  desinat  ius  suum  persequi,  ubi  videt  homines  ipsos  ita  esse  praefractos,  ut  nihil  proficiat  suis  ferulis.  Adhuc  igitur,  inquit.  Nec  dubium  est  quin  haec  comminatio  exacerbaverit  animos  gentis.  Nam  quum  auderent  Deo  obstrepere,  sicuti  videmus  multis  locis,  et  dicerent  spinosas  esse  eius  vias,  non  parcebant  prophetis,  et  hoc  etiam  videbimus  suo  loco.  Nam  odiosum  nomen  imposuerant  prophetis,  Quid?  isti  prophetae  nihil  aliud  crepant  quam  onera,  onera,  quasi  Deus  semper  fulminaret  contra  nos:  satius  esset  habere  clausas  aures,  quam  assidue  nos  ita  terreri  ipsorum  vocibus.  Ergo  certum  est,  fuisse  hoc  durum  Iudaeis  quum  diceret  propheta,  Adhuc  Deus  vobiscum  disceptabit  Sed  oportuit  ita  fieri.  Discamus  igitur  ex  hoc  loco,  si  Deus  aliquando  nos  coarguit  non  tantum  verbis,  sed  etiam  re  ipsa,  et  scelerum  nostrorum  nos  admonet,  non  ideo  defungi  una  culpa  ut  securi  simus  in  posterum,  sed  donec  ex  animo  resipiscamus,