37:505  505  IN  IEREMIAM.  CAP.  II.  506  demnatio  impendet  eorum  capitibus,  dum  ita  usurpant  impie  ad  se,  et  sacrilega  audacia  sacros  titulos,  et  spoliant  Deum  iusto  suo  honore.  Sic  ergo  nunc  Ieremias,  quum  de  prophetis  loquitur  designat  impostores,  qui  impie  tunc  populum  fallebant.  Dicit  ipsos  prophetare  in  Baal,  hoc  est,  plus  deferre  autoritatis  idolis,  quam  vero  Deo.  Scimus  venisse  tunc  nomen  Baal  in  communem  usum.  Saepe  plurali  numero  prophetae  vocant  Baalim,  quaelibet  idola:  sed  quum  Baal  significet  patronum,  quum  loquuntur  prophetae  vel  de  Baal  in  singulari  numero,  vel  de  Baalim  in  numero  plurali,  intelligunt  omnes  minores  deos,  qui  tunc  coacervati  erant  a  Iudaeis:  quasi  Deus  non  esset  contentus  sola  sua  virtute,  sed  opus  haberet  sociis  et  auxiliaribus  :  quemadmodum  hodie  in  papatu  fatentur  quidem  unicum  esse  summum  Deum  :  sed  interea  nihilo  plus  illi  deferunt  quam  suis  idolis,  quae  sibi  fabricant  pro  libidine.  Idem  etiam  vitium  tunc  regnavit  apud  Iudaeos,  imo  apud  omnes  gentes.  Fuit  enim  haec  simplex  et  ingenua  omnium  confessio,  unum  esse  supremum  numen:  sed  interea  erat  innumera  deorum  turba:  omnes  illi  erant  Baalim.  Ergo  quum  propheta  hic  dicit  doctores  fuisse  ministros  Baal,  opponit  hoc  nomen  vero  et  unico  Deo:  quasi  diceret,  fuisse  doctrinas  ab  ipsis  corruptam  quia  transsilierint  fines  suos,  neque  acquieverint  in  pura  legis  doctrina:  sed  admiscuerint  corruptelas  hinc  inde,  nempe  ex  turba  illa  deorum,  quam  sibi  confinxerant  profanae  gentes.  Neque  hic  propheta  insistit  in  ipso  nomine.  Fieri  enim  potest  ut  falsi  illi  doctores  prae  se  tulerint  nomen  aeterni  Dei,  sed  falso:  at  Deus  non  est  sophista.  Non  est  igitur  quod  putant  papistae  hodie  se  esse  dissimiles  veteribus  illis  impostoribus,  quia  unius  Dei  nomen  obtendant.  Id  enim  semper  factum  est:  neque  hodie  primum  coepit  Satan  se  transfigurare  in  angelum  lucis.  Sed  omnibus  saeculis  semper  doctores  omnes  isti  in  calice  aureo  propinarunt  suum  venenum,  hoc  est,  omnes  errores  et  fallacias.  Tametsi  igitur  tunc  prophetae  iactarent  se  divinitus  esse  missos,  et  plenis  buccis  detonarent  se  esse  servos  Dei  Abrahae,  hoc  tamen  totum  inane  fuit.  Nam  miscebant  suas  corruptelas,  quas  sibi  accersiverant  ex  impiis  gentium  erroribus.  Sequitur,  Et  post  eos  qui  non  prosunt  profecti  sunt.  Iterum  obliqua  comparatione  exaggerat  eorum  crimen,  quod  scilicet  spreverint  ipsum,  quem  cognoverant  tot  documentis  esse  patrem  suum  et  salutis  autorem,  cuius  palpaverant  quasi  manibus  immensam  potentiam:  deinde  sequuti  sunt  sua  figmenta,  quia  scilicet  nihil  erat  in  omnibus  idolis,  quod  alliceret  Israelitas.  Quum  ergo  inanes  et  nullius  utilitatis  fallacias  sequuti  sint,  hinc  atrocius  redditur  eorum  crimen.  Postea  sequitur,