9:504  quae  subterfugia,  quas  fraudes  vel  captiones  aut  versutias  ostendit?  Omitto  graecas  voces,  quas  ne  perderet,  adiectiva  pro  substantivis  ponendo  suam  inscitiam  prodit.  Fatetur  me  reiicere  metaphoras  et  allegorias,  et  ad  metonymiam  decurrere.  Nihil  adhuc  captiosum  profert.  Dicit  secundo,  a  me  repudiari  eorum  sententiam,  qui  affirmant  comedere  corpus  Christi  nihil  esse  aliud  quam  fide  amplecti  eius  beneficia.  Haec  quoque  distinctio  minime  fumum  pro  luce  affert,  sed  rem  apte  et  significanter  explicat.  Quod  Christi  carnem  spiritualiter  edere  mihi  aliquid  maius  est  ac  praestantius  quam  credere,  chimaeram  vocat.  Quid  tam  improbo  convicio  respondeam,  nisi  eum  esse  mente  captum,  quando  se  ipse  in  re  tam  plana  et  soluta  non  explicat?  Nam  quod  in  locum  carnis  et  sanguinis  supponit  meritum  ac  beneficium,  et  paulo  post  addit  me  non  aliam  quam  deitatis  praesentiam  in  coena  fateri,  me  tacente  libri  mei  calumniae  impudentiam  coarguunt.  Nam  ut  alios  plurimos  locos  omittam,  postquam  de  toto  mysterio  familiariter  in  Catechismo  disserui,  sequitur  tandem  clausula.  I.  *)  Solamne  eorum  quae  dixisti  beneficiorum  significationem  habemus  in  coena,  an  illic  re  ipsa  nobis  exhibentur?  R.  Quum  Dominus  noster  Christus  ipsa  sit  veritas,  minime  dubium  est  quin  promissiones,  quas  dat  illic  nobis,  simul  etiam  impleat,  et  figuris  suam  addat  veritatem.  Quamobrem  non  dubito  quin  sicuti  verbis  ac  signis  testatur,  ita  etiam  suae  nos  substantiae  participes  iaciat,  quo  in  unam  cum  eo  vitam  coalescamus.  I.  Verum  qui  hoc  fieri  potest,  quum  in  coelo  [pag.  71]  sit  Christi  corpus,  nos  autem  in  terra  adhuc  peregrinemur?  R.  Hoc  mirifica  arcanaque  spiritus  sui  virtute  efficit:  cui  difficile  non  est  sociare  quae  locorum  intervallo  alioqui  sunt  disiuncta.  Institutionis  porro  haec  verba  sunt:  2)  Non  satisfacere  mihi  eos,  qui  dum  communicationis  modum  ostendere  volunt,  nos  docent  spiritus  Christi  esse  participes,  praeterita  carnis  et  sanguinis  mentione.  Quasi  de  nihilo  dictum  foret:  Caro  mea  vere  est  cibus:  et  quae  sequuntur.  Prolixa  enim  huius  rei  explicatio  sequitur  et  iam  ante  aliquid  dictum  fuerat.  Libro  autem  secundo  non  minore,  ut  existimo,  perspicuitate  quam  diligentia  Osiandri  commentum  refutaveram:  cuius  me  subscriptorem  esse  mentitur.  Imaginatus  est  Osiander  conferri  nobis  iustitiam  a  deitate  Christi.  Ostendi  contra,  salutem  et  vitam  a  Christi  carne  petendam  esse,  in  qua  se  ipsum  sanctificavit,  et  in  qua  baptismum  et  coenam  nobis  consecrat.  Alterum  quoque  somnium  de  essentiali  iustitia  quam  probe  discusserim  illic  apparet.  1)  Quas  hic  describit  Interrogationes  et  Responsiones,  exstant  in  edit.  nostra  T.  VI,  p.  128.  2)  Lib.  IV,  cap.  17,  §.  7.