40:504  enim  illa  minime  humana  vitae  ratio,  in  solitudine  vagari,  nihil  adspicere  iucundum  vel  amoenum:  pro  cultis  agris  meram  solitudinem,  pro  florum  amoenitate,  pro  arboribus,  pro  delectabili  terrae  forma  non  nisi  squalorem  videre:  deinde  non  alio  vesci  pane  quam  manna,  vinum  nullum  gustare,  sed  bibere  tantum  ex  rupe  :  et  interea  agere  sub  dio7  perferre  frigus  et  calorem.  Erat  igitur  liberatio  minime  optabilis,  nisi  sperassent  se  tandem  fore  compotes  terrae  Chanaan.  Atqui  tota  illa  aetas  privata  fuit  illo  beneficio  ob  suam  ingratitudinem.  Deus  ergo  hic  apposite  ipsos  comparat  patribus,  qui  egressi  fuerant  usque  in  desertum:  ac  dicit,  transire  vos  faciam  in  desertum  gentium.  Hic  comparat  desertum  Aegypti  cum  deserto  gentium.  Etsi  autem  transitus  a  terra  Chanaan  ad  Chaldaeos  aliqua  ex  parte  continet  aridum  et  sterile  desertum:  tamen  non  dubito  quin  Deus  hic  metaphorice  designet  statum,  in  quo  populus  deget  postquam  reversus  fuerit  ab  exsilio.  Summa  est,  quemadmodum  circumduxit  patres  ipsorum  tota  vita  in  deserto,  sic  postquam  educti  fuerint  e  Chaldaea  fore  tamen  eorum  vitam  quasi  solitariam,  ac  si  essent  relegati  in  angulum  aliquem  obscurum,  et  in  terram  squalidam  ac  desertam.  Hic  ergo  non  notatur  aliqua  regio,  sed  status  in  quo  populus  fuit  etiam  quum  incoleret  terram  Chanaan.  Quanquam  non  tantum  de  exigua  illa  manu  loquitur  quae  in  patriam  rediit:  sed  quum  omnibus  promiscue  data  esset  libertas.  Desertum  gentium  vocat  statum,  cui  omnes  subiecti  fuerunt  sive  manerent  in  longinquis  regionibus,  sive  domum  redirent.  Tenendum  igitur  est,  Deum  sic  fore  liberatorem  populi,  ut  beneficium  eius  non  perveniat  nisi  ad  paucos:  quia  ubi  multitudo  in  deserto  erraverit,  tandem  illic  putrescet,  neque  potietur  promissa  haereditate.  Nunc  videmus  quomodo  sibi  Deus  asseruerit  imperium  in  Israelitas,  quum  passus  non  est  perpetuo  teneri  captivos,  et  tamen  non  reduxerit  ipsos  ut  se  ostenderet  placatum,  quia  non  destitit  propterea  rigidus  esse  iudex.  Adducam  igitur  in  desertum  gentium:  hic  est  fervor  iracundiae,  de  quo  loquutus  fuerat:  et  iudicabor  vobiscum,  vel  disceptabo  iuro  facie  ad  faciem.  Significat  his  verbis,  quamvis  reditus  illis  pateat  in  Iudaeam,  non  ideo  tamen  se  illis  fore  propitium,  quia  occurret  illis  tanquam  adversarius.  Illic,  inquit,  facie  ad  faciem  congrediar  vobiscum  :  sicuti  ubi  efferbuit  contentio,  inter  se  confligunt  adversarii,  et  quasi  consertis  manibus  pugnant:  ita  Deus  extremum  rigorem  hic  designat  quum  dicit  se  proditurum  ut  facie  ad  faciem  cum  ipsis  disceptet.  Quod  autem  dicit  se  fuisse  iudicatum  in  deserto  Aegypti,  et  idem  in  futurum  tempus  extendit,  non  ita  debet  intelligi  quasi  Deus  ad  causam  agendam  descenderit,  ut  se  sisteret  ad  alienum  tribunal:  sed  hoc  genus  disceptationis  fuit,  quum  populus  coactus