40:502  sicuti  Deus  specialem  eius  curam  gerit,  ita  castigat  etiam  severius  delicta.  Videmus  ut  parcat  incredulis  et  extraneis,  ac  si  conniveret  ad  eorum  scelera:  interim  semper  manus  eius  extenta  est  ad  castigandos  omnes  qui  profitentur  se  esse  ex  numero  piorum.  Illi  ergo  cuperent  Deo  valedicere  si  ipsis  daretur  optio.  Ideo  dixi  hunc  locum  notandum  esse.  Israelitae  putabant  nihil  magis  praestare,  quam  ut  gentibus  coniuncti  nihil  ab  ipsis  differrent:  quia  imaginabantur  hoc  modo  sibi  plus  fore  relaxationis,  quod  Deus  rigidior  erga  ipsos  fuerat,  quam  erga  exteros  :  deinde  quia  videbant  se  obnoxios  esse  multis  periculis  et  molestiis:  videbant  se  undique  impeti,  et  audiebant  quotidianas  minas.  Hinc  igitur  perversa  deliberatio  quae  hic  coarguitur,  quod  adscendit,  inquit,  super  spiritum  vestrum  nullo  modo  fiet,  quia  vos  dicitis,  erimus  sicut  gentes,  et  sicut  familiae  terrarum.  Sed  finis  quoque  spectandus  est,  quia  tanta  erat  populi  illius  stultitia,  ut  putaret  se  fore  immunem  a  Dei  flagellis,  si  religionem  prorsus  abiiceret.  Deus  ergo  negat  id  se  passurum.  Nunc  sequitur  clarior  explicatio,  Vivo  ego,  inquit,  si  non  in  manu  robusta  et  brachio  extento  dominabor  super  vos:  quasi  diceret,  ubi  omnia  effugia  captaverint,  tamen  se  fore  vindicem  iuris  sui  et  imperii,  ut  invitos  cogat  ad  se  redire,  quemadmodum  si  violenter  retraheret  fugitivos,  ut  dictum  fuit.  Nunc  videmus  quanta  fuerit  populi  stupiditas,  dum  putavit  hoc  unicum  esse  remedium  suis  aerumnis,  si  deficeret  prorsus  a  vera  pietate.  Ergo  cavendum  est,  ne  ubi  Deus  nos  castigat  sic  obdurescamus,  ut  cupiamus  nos  subducere  ab  eius  manu  et  subiectione.  Interea  ostendit  Deus  se  dominaturum,  sed  alio  modo:  quia  scimus  quam  humaniter  populum  illum  sustinuerit,  quanta  patientia  usus  fuerit  quum  toties  iram  eius  provocarent.  Nunc  pronuntiat  se  fore  dominum,  sed  in  manu  valida,  et  brachio  extento,  nempe  quia  superioris  clementiae  oblitus  subiget  tanquam  perversa  mancipia,  quemadmodum  ubi  videt  dominus  non  posse  extorqueri  voluntarium  obsequium  a  servis,  damnat  ipsos  vel  ad  pistrinum,  vel  ad  alias  immanes  operas,  perinde  ac  si  essent  semimortui.  Denuntiat  itaque  Deus  tale  fore  dominationis  genus  quo  utetur:  quia  clementer  ignoscendo  nihil  profecerit.  Sequitur,  34.  Et  educam  vos  e  populis,  et  colligam  vos  e  terris  per  quas  fuistis  dispersi,  in  manu  -valida  (vel  robusta)  et  brachio  extento,  et  excandescentia  effusa.  Confirmat  eandem  sententiam,  et  simul  designat  modum  illius  dominationis.  Nam  quum  dispersi  essent  Iudaei  in  exsilio,  erant  quasi  alieni  a  Dei  iurisdictione.  Erant  enim  permixti  gentibus.  Illa  igitur  conditio  videri  poterat  quaedam  exemptio,  vel  immunitas.  Nunc  significat  Deus  quum  volet  32*