5:501  CONSILIUM  PAULI  III.  Tantisper  forsan  consensum  horum  monarchiarum  pontificii  optent,  dum  publica  christiani  nominis  pace  ad  conficiendos  exstlnguendosque  protestantes  abutantur.  Quam  autem  alias  veram  et  stabilem  concordiam  inter  hosce  monarchas  ferre  pontifex  soleat  et  ipsi  sunt  optimi  testes  et  satis  superque  pridem  tot  gravissimis  Italiae  calamitatibus  declaratum  est.  Protestantes  autem  quia  non  principum  dissidiis  sed  Christo  confidunt  et  quum  ab  omni  rerum  humanarum  perturbatione  tum  sanguinis  christiani  profusione,  ut  par  est,  abhorrent:  hos  principes  sublatis  dissidiis  omnibus  convenire  inter  se  ex  animo  optant.  Neque  enim  dubitant  quin  tum  daturus  sit  Deus,  ut  inita  sancta  conspiratione  sicut  Turcis  propulsandis,  ita  et  ecclesiis  restituendis  sese  impendant.  Habent  igitur  protestantes  causam  cur  perpetua  et  virium  et  animorum  coniunctione  cohaerere  ipsos  inter  se  velint.  Poterunt  etiam  maiestates  suae  reiectis  (ut  dictum  est)  tractatibus  religionis  ad  concilium  interim  cum  principibus  catholicis  de  auxilio  contra  Turcam  se  stabilire  sine  ulla  mora.  Atqui  si  Dei  beneficio  porro  fiat  quod  fieri  coeptum  est,  ut  plures  communi  religione  Christi  quam  vulgari  superstitione  catholici  fieri  malint  eaque  causa  se  protestantibus  adiungant  socios,  potius  quam  in  pontificii  foederis  societatem  adduci  se  sinant,  quid  inquam  tunc  futurum  est?  Nam  ipse  iam  pontifex  confessus  est,  non  aliter  resisti  posse  huic  atrocissimo  hosti  quam  si  universae  christiani  nominis  vires  inter  se  coalescant  et  coadunentur  ad  ipsum  opprimendum.  Quod  si  etiam  stabilito  catholicorum  foedere  et  coepto  per  maiestates  suas  concilio,  et  incisa  protestantium  spe,  de  religione  pervertenda  et  bonis  ecclesiarum  diripiendis  .  .  .  .  [fol.  43]  Bella  et  expedita  pontificis  ratio,  siquidem  eam  Christus  ratam  habeat.  Nihil  benevolentia,  aut  humanitate  obtineri  a  protestantibus  posse  spes  est,  eo  itaque  necessitatis  adigantur,  ne  se  movere  ausint.  Deinde  coepto  concilio  admonendi  erunt  a  principibus,  ut  ad  audiendam,  quae  in  caput  suum  feretur,  sententiam  sistant.  Atque  hic  obiter  aperit,  quousque  progredi  in  animo  habeat.  Coepto,  inquit,  concilio  quamprimum  de  protestantibus  agatur,  et  quando  perficietur?  Ex  ipsa  agendi  serie  aestimare  licet.  Est  tamen  aliquid  quod  de  inchoando  loquitur,  quasi  difficile  aut  novum  sit  fucum  facere,  ut  indictum  habeatur  pro  incepto.  Verum  fingamus  huc  quoque  se  extendere  papae  largitatem.  Quid  prima  statione  fiet?  Sicut  gravioribus  malis  quaerenda  sunt  priore  loco  remedia:  a  protestantibus  sumendum  exordium.  Compareant  igitur  vel  ad  causam  dicendam,  vel  si  ita  patribus  visum  fuerit,  ad  audiendam  indictae  causae  sententiam.