39:500  mature  occurrit,  et  iubet  ipsum  despicere  altitudinem  murorum  et  turrium,  et  quamvis  Babylon  perstringat  aliorum  omnium  oculos,  ut  tamen  ipse  quasi  e  sublimi  despiciat  totam  illam  superbiam.  Quum  ergo  ingressus  fueris  urbem,  et  conspexeris  eam,  tunc  leges  librum  hunc.  tflp  significat  clamare  et  promulgare:  sed  significat  etiam  legere.  Potuit  igitur  seorsum  apud  se  librum  hunc  legere  Seraiah  :  nec  dubito  quin  ita  exponi  debeat  hoc  verbum,  sicuti  nunc  videbimus.  Non  oportuit  ergo  Seraiam  pro  suggestu,  vel  in  via  publica,  coetu  vocato,  recitare  hunc  librum:  sed  satis  fuit  si  privatim  legeret  apud  se,  et  absque  testibus.  Et  hoc  etiam  satis  colligitur  ex  ipso  contextu:  Et  dices,  Iehovah,  tu  loquutus  es  contra  hunc  locum.  Hinc  apparet,  mandatum  tuisse  Seraiae  ut  librum  legeret,  non  ut  proficerent  auditores.  Fuissent  enim  bis  surdi  ad  sermonem  Seraiae.  Neque  vero  probabile  est,  tunc  familiarem  fuisse  linguam  hebraicam  Chaldaeis  :  erat  magna  affinitas,  ut  satis  notum  est:  sed  fuit  etiam  aliquid  diversum.  Verum  colligimus  ex  hoc  verbo  lectionem  fuisse  in  cubiculo,  aut  loco  secreto,  quia  iubetur  Seraiah  colligere  omnes  suos  sensus  ad  Deum,  et  ad  ipsum  etiam  sermonem  dirigere.  Non  ergo  suscepit  provinciam  vel  munus  praeconis,  ut  palam  haec  omnia  promulgaret  apud  Babylonios:  sed  urbe  inspecta,  debuit  librum  secum  reputare,  hoc  est,  quod  illic  scriptum  erat.  Et  haec  etiam  ratio  notatu  digna  est,  quia  utcunque  animosi  sumus,  tamen  magis  se  prodit  nostra  constantia  et  libertas,  ubi  versamur  coram  hominibus,  quam  ubi  sumus  soli,  et  Deus  nobis  est  solus  testis.  Nam  ubi  nemo  nos  adspicit,  tunc  trepidamus,  et  quum  ante  visi  fuerimus  valde  animo  virili,  tunc  metus  nos  corripit.  Vix  centesimus  quisque  est,  qui  solo  Deo  teste  sit  fortis,  ut  deceret  :  sed  pudor  nos  reddit  animosos,  et  extorquet  nobis  constantiam,  et  vigor,  qui  in  privato  est  quasi  exstinctus,  tunc  excitatur.  Quoniam  ergo  ambitio  fere  semper  regnat  inter  homines,  ideo  hic  locus  diligenter  notandus  est  quum  propheta  praecipit  Seraiae,  ut  agat  seorsum  cum  Deo,  et  quamvis  nullus  mortalium  illic  adsit,  ut  sese  confirmet,  idque  fretus  certa  et  infallibili  Dei  fide,  Dices  igitur,  Iehovah.  Et  hoc  certe  est  verum  fidei  experimentum,  ubi  nobiscum  expendimus  Dei  promissiones,  et  non  prodimus  in  publicum,  ut  profiteamur  nostram  fortitudinem  :  sed  ubi  quisque  tacite  agnoscit  Deum  esse  veracem,  et  sese  confirmat  in  eius  promissionibus,  et  ita  despicit  perversa  omnium  iudicia,  ne  vel  si  solus  sit  in  mundo,  tamen  animum  despondeat.  Haec  est  vera  et  seria  fidei  probatio.  Dices  igitur,  Iehovah,  tu  loquutus  es  contra  hunc  locum.  Hic  est  verborum  finis,  ut  Seraiah  statuat  Deum  esse  veracem,  et  amplectatur  coram  ipso  quidquid  legit,  et  non  dubitet  quin  sermo,  qui  a  Deo  profectus  sit,  habeat