58:50  puis  quand  il  dit:  En  soy-mesme:  c'est  pour  nous  advertir  que  si  nous  voulons  savoir  la  cause  pourquoy,  c'est  autant  comme  si  nous  voulions  faire  une  anathomie  de  Dieu,  et  aller  iusques  en  son  coeur,  et  sonder  tous  ses  secrets.  Et  le  pourrons-nous  faire?  Quelle  outrecuidance  est-ce  la?  Ainsi  donc,  quand  nous  souffrirons  d'estre  enseignez  de  Dieu,  il  est  certain  qu'il  nous  respondra,  entant  qu'il  sera  besoin,  de  ce  qui  appartient  a  nostre  salut:  et  notamment  nous  saurons  ce  qui  surmonte  toute  intelligence  humaine,  comme  Ies  uns  sont  eleus  de  lui,  et  les  autres  sont  reprouvez:  et  pourquoy?  les  uns  n'ont  nulle  doctrine,  comme  les  Papistes,  et  autres  infideles,  que  Dieu  laisse  la,  comme  povres  aveugles,  et  que  les  autres  sont  illuminez  par  l'evangile.  Et  puis  de  ceux  ausquels  l'evangile  se  presche,  les  uns  le  recoivent  en  obeissance,  ils  en  sont  touchez  au  vif,  et  perseverent  iusques  a  la  fin  :  et  les  autres  demeurent  estourdis,  ou  bien  ils  seront  pleins  de  felonnie,  pour  resister  a  Dieu:  ou  bien  ils  seront  volages,  et  se  desbaucheront,  et  reietteront  tout  ioug,  quand  ils  auront  este  introduits  au  bon  chemin.  Et  d'ou  procede  ceste  diversite-la?  Il  nous  faut  venir  a  ceste  source  que  nous  monstre  l'escriture  saincte  :  C'est  qu'une  pareille  grace  n'a  pas  este  faite  a  tous.  Ainsi  voila  nostre  vraie  sagesse  :  c'est,  que  nous  soions  bons  escoliers  de  Dieu:  et  nous  serons  ses  escoliers,  quand  nous  ne  cercherons  sinon  de  savoir  ce  qu'il  cognoist  nous  estre  bon  et  expedient  pour  nostre  salut:  que  nous  demeurerons  la  tous  cois,  et  que  nous  apprendrons  de  captiver  la  nos  sens,  et  les  tenir  en  bride  courte  :  Lors,  di-ie,  quand  il  sera  parle  de  l'election  secrette  de  Dieu,  comme  il  a  predestine  a  salut  ceux  qu'il  a  voulu,  et  comme  il  a  reprouve  les  autres:  nous  ne  serons  point  troublez,  et  pourquoy?  Car  nous  estans  enquis  de  la  volonte  de  Dieu,  nous  conclurons  qu'il  nous  faut  tenir  a  ce  qu'il  nous  monstre,  et  a  ce  que  l'escriture  porte,  la  ou  il  nous  a  rendu  tesmoignage  suffisant  de  ce  qu'il  cognoist  nous  estre  bon.  Au  reste  il  y  a  tant  de  tesmoignages  en  l'escriture,  pour  nous  certifier  de  ceste  doctrine,  qu'il  faut  que  tous  ceux  qui  ne  s'y  peuvent  arrester  soient  comme  envenimez  de  Satan,  et  qu'ils  aient  conceu  un  esprit  de  pointe,  et  d'orgueil  et  de  rebellion,  pour  ne  se  point  renger  a  la  volonte  de  Dieu  :  et  que,  bref,  ils  veulent  despiter  toute  doctrine  et  instruction,  qu'ils  ferment  les  yeux  en  plein  midi,  et  qu'ils  aient  les  aureilles  bouchees,  combien  que  Dieu  retentisse  haut  et  clair,  et  qu'ils  aient  occasion  de  se  contenter  tant  et  plus.  D'amasser  tous  les  tesmoignages,  il  n'en  est  ia  besoin:  mais  c'est  assez  que  nous  aions  eu  une  somme,  voire  toute  evidente,  comme  ie  l'ay  desia  monstre  en  brief.  Au  reste,  nous  avons  aussi  dequoy  benir  Dieu,  et  nous  esiouir  en  lui,  quand  nous  savons  droictement  appliquer  4