52:50  10.  Ut  cognoscam  ipsum.  Describit  vim  et  naturam  fidei:  quod  scilicet  sit  Christi  cognitio:  nec  ea  nuda  vel  confusa,  sed  dum  percipitur  virtus  resurrectionis  ipsius.  Resurrectionem  posuit  pro  redemptionis  complemento:  ita  ut  mortem  sub  se  contineat.  Sed  quia  parum  est,  Christum  agnoscere  crucifixum  et  excitatum  a  mortuis,  nisi  fructum  quoque  apprehendas:  nominatim  de  efficacia  loquitur.  Tunc  ergo  rite  cognoscitur  Christus,  dum  sentimus  quid  valeat  mors  eius  et  resurrectio,  et  qualiter  in  nobis  sit  efficax.  Omnia  autem  illie  nobis  sunt  posita:  expiatio  et  abolitio  peccati,  liberatio  a  reatu,  satisfactio,  mortis  victoria,  iustitiae  acquisitio,  spes  beatae  immortalitatis.  Et  communicationem  passionum.  Postquam  de  gratuita  iustitia  loquutus  est,  quam  resurrectione  Christi  partam  fide  obtinemus:  subiungit  de  exercitiis  piorum,  idque  ne  videatur  otiosam  fidem  inducere,  quae  nullos  pariat  effectus  in  vita.  Et  subindicat,  haec  esse  studia  quibus  exerceri  suos  velit  Dominus:  quum  ieiuna  caeremoniarum  elementa  pseudoapostoli  obtruderent.  Qui  ergo  fide  compos  est  factus  omnium  bonorum  Christi,  is  sibi  propositam  esse  conditionem  agnoscat,  ut  tota  vita  configuretur  morti  eius.  Caeterum  duplex  est  societas  et  communicatio  mortis  Christi.  Altera  est  interior,  quam  scriptura  vocare  solet  mortificationem  carnis,  aut  crucifixionem  veteris  hominis:  de  qua  tractat  Paulus  ad  Romanos  capite  sexto.  Altera  est  exterior,  quae  vocatur  mortificatio  externi  hominis:  ea  est  crucis  tolerantia,  de  qua  tractat  octavo  eiusdem  epistolae  capite:  atque  hic  etiam,  nisi  fallor.  Nam  post  comprehensam  resurrectionis  virtutem,  proponitur  nobis  Christus  crucifixus,  ut  per  tribulationes  et  aerumnas  ipsum  sequamur.  Ideoque  mortuorum  resurrectio  diserte  exprimitur,  ut  sciamus  moriendum  esse  antequam  vivamus.  Haec  est  continua  fidelium  meditatio,  quamdiu  peregrinantur  in  terra.  Haec  vero  eximia  est  consolatio,  quod  in  omnibus  miseriis  sumus  socii  crucis  Christi,  si  sumus  eius  membra,  ut  per  afflictiones  via  nobis  pateat  ad  aeternam  beatitudinem.  Quemadmodum  alibi  (2.  Tim.  2,  l  l  )  habetur:  Si  commorimur,  simul  vivemus:  si  compatimur,  simul  regnabimus.  Huc  igitur  comparatos  esse  nos  omnes  convenit,  ut  tota  vita  nostra  nihil  quam  mortis  imaginem  repraesentet,  donec  mortem  ipsam  pariat.  Sicuti  vita  Christi  nihil  aliud  fuit  quam  mortis  praeludium.  Sed  hac  consolatione  interea  fruimur,  quod  finis  est  aeterna  beatitudo.  Mors  enim  Christi  cum  resurrectione  coniuncta  est.  Ideo  dicit  Paulus,  se  eius  morti  fieri  conformem,  ut  ad  gloriam  resurrectionis  perveniat.  Particula  si  quo  modo,  non  est  dubitationis,  sed  difficultatem  notat,  excitandi  tudii  nostri  causa.  Neque  enim  leve  certamen  est,  dum  luctamur  cum  tot  ac  tantis  obstaculis.