51:50  nous  destruisons  les  bonnes  oeuvres,  que  nous  voulons  introduire  une  licence  de  tout  mal,  pour  oster  toute  affection  de  servir  a  Dieu.  Et  pourquoy  cela?  C'est  d'autant  que  nous  despouillons  les  hommes  de  toute  vaine  presomption  et  arrogance,  et  leur  monstrons  qu'il  n'y  a  autre  moyen  d'esperer  en  Dieu,  sinon  qu'ils  s'arrestent  a  sa  pure  bonte  au  nom  de  nostre  Seigneur  Iesus  Christ.  Nous  alleguons  que  tout  ce  qu'on  appelle  merite  n'est  qu'abomination  devant  Dieu,  quand  les  hommes  se  font  ainsi  accroire  qu'ils  sont  leurs  sauveurs.  Voila  donc  toute  hautesse  des  hommes  qui  est  abatue  par  nostre  doctrine.  Or  cela  n'emporte  pas  que  chacun  se  donne  liberte  de  mal  faire,  et  qu'on  ne  se  soucie  plus  de  servir  Dieu,  ne  de  le  craindre.  Mais  a  l'opposite  nous  disons  que  Iesus  Christ  ne  nous  est  pas  seulement  donne  a  fin  que  par  son  moyen  nous  obtenions  remission  de  nos  pechez  devant  Dieu:  mais  c'est  a  ce  qu'estans  regenerez  par  son  sainct  Esprit  nous  cheminions  en  nouveaute  de  vie.  Or  tous  ceux  qui  si  hardiment  maintiennent  les  bonnes  oeuvres  et  les  merites,  quels  sont-ils?  On  void  qu'il  nfj  a  que  puantise  execrable  en  toute  leur  vie.  Car  si  on  cerche  des  gaudisseurs  qui  soyent  du  tout  profanes,  qui  n'ayent  point  un  seul  sentiment  de  venir  iamais  a  conte,  qu'ils  soyent  comme  insensez  de  Satan,  il  est  certain  que  ce  sont  telles  gens.  Au  reste  quand  ils  magnifient  les  bonnes  oeuvres,  a  quoy  est-ce  qu'ils  veulent  qu'on  s'addonne?  Qu'on  barbotte  beaucoup,  qu'on  vienne  a  matines  et  a  vespres,  qu'on  trotte  d'autel  en  autel,  qu'on  adore  les  marmousets,  qu'on  les  pare  bien,  qu'on  achete  force  pardons,  qu'on  coure  en  pelerinage  :  bref  qu'on  se  mocque  pleinement  de  Dieu,  comme  si  tout  son  service  n'estoit  qu'un  ieu  de  petis  enfans.  Il  est  vray  qu'ils  n'oseront  pas  dire  que  ce  ne  soit  une  chose  bonne  et  louable  que  d'estre  temperant,  que  d'estre  chaste  et  sobre,  et  choses  semblables:  mais  tant  y  a  qu'ils  quittent  tout  cela  aisement,  moyennant  qu'on  retienne  leurs  superstitions.  Bref,  tous  les  commandemens  de  Dieu  sont  mis  sous  le  pied,  et  comme  foulez,  et  leur  semble  qu'il  n'y  a  nulle  devotion  ni  sainctete,  sinon  entant  qu'on  fera  tous  ces  beaux  agios  et  des  choses  de  neant.  Voila  le  combat  qu'a  eu  sainct  Paul  de  son  temps  qui  dure  encores  auiourd'huy.  Pour  ceste  cause  il  dit  que  si  ses  adversaires  contre  lesquels  il  dispute  veulent  maintenir  la  Loy  de  Dieu,  qu'ils  regardent  bien  a  qui  elle  s'addresse,  et  qu'ils  commencent  par  eux-mesmes:  et  s'ils  veulent  avoir  des  bons  disciples,  qu'ils  les  enseignent  a  sobriete,  a  mansuetude,  a  chastete,  a  patience  et  a  choses  semblables:  et  puis  qu'ils  ies  instruisent  a  renoncer  a  tous  leurs  appetis