45:50  Apud  te  est  propitiatio,  ut  timearis  (Psal.  130,  4)%  Deus  enim  homines  data  pace  comiter  ad  se  invitans  facit,  ut  libenter  accedant  et  cum  liberali  eius  colendi  affectu.  Hinc  et  Paulus  sententiam  illam  deducit,  peccatum  esse  quidquid  sine  fide  suscipitur,  Rom.  14,  23.  Quum  autem  Deus  homines  sibi  in  Christo  reconciliet,  quum  eiusdem  praesidio  ipsos  tueatur,  ut  securi  sint  ab  omni  metu,  quum  eorum  salutem  in  eius  manum  et  custodiam  deposuerit,  merito  Zacharias  nos  eius  gratia  praedicat  a  metu  liberari.  Ideo  prophetae  hoc  proprium  adscribunt  eius  regno,  ut  pacem  homines  secure  colant,  et  tranquillo  gaudio  fruantur.  75.  In  sanctitate  et  iustitia.  Sicuti  duabus  tabulis  complexus  est  Deus  bene  vivendi  regulam,  ita  hic  Zacharias  pronuntiat,  legitime  tunc  demum  nos  servire  Deo,  quum  ad  sanctitatem  et  iustitiam  composita  est  vita  nostra:  neque  enim  dubium  est,  quin  sanctitas  pietatis  officia  designet,  quae  spectant  ad  priorem  legis  tabulam,  quod  ne  Platonem  quidem  latuit.  Iustitia  autem  ad  omnia  caritatis  officia  extenditur,  quia  non  aliud  exigit  Deus  a  nobis  in  secunda  legis  tabula,  nisi  ut  cuique  reddamus  quod  suum  est.  Additur,  coram  ipso,  ut  sciant  fideles,  non  satis  esse,  si  coram  hominum  oculis  vitam  suam  pulcre  moderentur,  manus,  pedes,  totumque  corpus  ab  omni  flagitio  contineant:  quoniam  eos  ad  Dei  arbitrium  vivere  oportet,  qui  externa  sanctimonia  contentus  non  est,  sed  cor  praecipue  intuetur.  Postremo  ne  quis  se  defunctum  putet,  ubi  aliquo  temporis  spatio  Deum  coluerit,  pronuntiat  Zacharias,  hac  lege  redemptos  esse  homines,  ut  colendi  Dei  studium  tota  vita  prosequantur.  Et  certe,  quum  aeterna  sit  redemptio,  eius  memoriam  nunquam  effluere  decet:  quum  sibi  in  perpetuum  homines  Deus  adoptet,  non  debet  caduca  vel  exigui  temporis  eorum  esse  gratitudo:  denique  quum  mortuus  sit  et  resurrexerit  pro  illis  Christus,  eum  vitae  et  mortis  dominum  esse  convenit.  Ideo  Paulus,  illo  quem  nuper  citavi  loco,  sanctam  et  iustam  vitam  prosequi  nos  iubet  usque  in  adventum  magni  Dei,  exspectantes,  inquit,  beatam  spem,  ete.  LUC.  I.  76.  Et  tu,  puer,  propheta  Altissimi  vocaberis:  praeibis  enim  ante  faciem  Domini  ad  parandas  vias  eius,  77.  Ad  dandam  scientiam  salutis  populo  eius  in  remissione  peccatorum  suorum:  78.  Per  viscera  misericordiae  Dei  nostri,  quibus  visitavit  nos  oriens  ex  alto,  79.  Tit  illucesceret  iis,  qui  in  tenebris  et  umbra  mortis  sedebant,  ad  dirigendos  pedes  nostros  in  viam  pacis.  80.  Puer  autem  crescebat,  et  corroborabatur  spiritu,  et  erat  in  desertis  usque  ad  diem  ostensionis  eius  apud  Israelitas.  4