41:50  siderationem  quartae  bestiae,  nisi  quatenus  arcano  instinctu  Deus  eum  impulit.  Fuit  ergo  haec  prophetae  attentio  ex  coelesti  impulsu.  Quare  nostrum  etiam  est,  non  oscitanter  legere  quae  hic  scripta  sunt,  sed  serio  expendere  et  summa  diligentia,  quid  voluerit  spiritus  per  hanc  visionem.  Attentus  ergo  erant,  inquit,  ad  cornua:  et  ecce  cornu  unum  parvum  exortum  fuit  in  illis.  Hic  incipiunt  variare  interpretes  :  quia  alii  hoc  ad  papam  detorquent,  alii  vero  ad  Turcam.  Sed  neutra  opinio  videtur  mihi  probabilis.  Falluntur  autem  utrique,  quoniam  existimant  hic  describi  totum  cursum  regni  Christi,  quum  tamen  Deus  prophetae  suo  tantum  indicare  voluerit  quid  futurum  esset  usque  ad  primum  Christi  adventum.  Hinc  igitur  omnium  error,  quod  volunt  complecti  sub  hac  visione  perpetuum  ecclesiae  statum  usque  ad  finem  mundi.  Sed  aliud  spiritus  sancti  consilium  fuit.  Diximus  initio,  cur  prophetae  haec  visio  apparuerit,  nempe  quia  poterant  centies  labascere  piorum  animi  in  illis  tam  horrendis  conversionibus  quae  instabant,  quum  viderent  nunc  ad  Persas  transire  summam  monarchiam,  nunc  postquam  irruperant  Macedones,  statim  potitos  esse  toto  Oriente,  postea  latrones  illos  qui  militaverant  sub  Alexandro,  subito  factos  esse  reges,  idque  partim  saevitia,  partim  vero  fraudibus,  et  perfidia,  qua  inter  se  magis  quam  armis  certaverant.  Deinde  quum  viderent  monarchias  omnes  illas  perire,  et  exsurgere  romanum  imperium,  quod  esset  prodigii  instar.  Poterant  ergo  exanimari  fideles  in  illis  tam  confusis  et  turbulentis  mutationibus.  Ergo  prophetae  haec  visio  oblata  fuit,  ex  qua  intelligerent  omnes  filii  Dei  quam  gravia  certamina  eos  manerent  ante  adventum  Christi.  Non  progreditur  ergo  nunc  Daniel  ultra  redemptionem  promissam,  et  non  complectitur,  ut  iam  dixi,  totum  Christi  regnum:  sed  contentus  est  adducere  fideles  ad  exhibitionem  gratiae,  quam  sperabant  et  expetebant.  Haec  autem  exhibitio  referri  debet  ad  primum  Christi  adventum,  ut  satis  notum  est.  Ego  igitur  non  dubito  hic  per  cornu  parvum  intelligi  Iulium  Caesarem,  et  reliquos,  nempe  Augustum  qui  ei  successit:  deinde  Tiberium,  Caligulam,  et  Claudium,  Neronem,  et  alios.  Quanquam,  ut  iam  dictum  est,  tenendum  est  spiritus  sancti  consilium,  quod  scilicet  perducat  fideles  usque  ad  exordia  regni  Christi,  hoc  est,  usque  ad  evangelii  promulgationem,  quae  facta  est  sub  Caligula,  sub  Claudio,  et  Nerone,  et  aliis  successoribus.  Vocat  autem  cornu  parvum,  quia  Caesar  non  sumpsit  sibi  regis  nomen:  sed  quum  devicto  Pompeio  et  maiore  parte  senatus,  non  posset  frui  victoria,  nisi  ad  se  raperet  totam  potentiam,  sumpsit  sibi  nomen  tribuni  plebis:  fuit  dictator:  interea  semper  fuerunt  consules  :  fuit  semper  aliqua  species  reipublicae,  dum  quotidie  senatum  consuleret,  sederet  in  subsellio,  quum  essent  in  tribunalibus  consules.  Idem  4