39:50  gotium,  quum  dicit  se  venturum  ad  Corinthios  secundo,  et  tertio,  ostendit  non  fore  adventum  inutilem  quia  nisi  resipuerint,  non  poterunt  elabi  ignorantiae  subterfugiis,  sicuti  solent  hypocritae.  Deus  ergo  voluit  pluribus  vaticiniis  confirmare  quod  semel  testatus  fuerat  de  restitutione  populi,  sed  praecipue  habuit  curam  fidelium,  ne  deficerent,  et  succumberent  tot  tentationibus  quae  ipsos  manebant  longo  temporis  successu.  Nam  quum  morituri  quidam  essent  in  exsilio,  poterant  abiicere  omnem  memoriam  foederis  Dei:  ita  anima  periisset  simul  cum  corpore:  qui  autem  redituri  erant  in  patriam,  opus  habebant  non  vulgari  fultura,  ut  constanter  certarent  per  septuaginta  annos,  et  semper  starent  animis  erectis  ad  Dei  misericordiam.  Nunc  ergo  tenemus  cur  Deus  iteraverit  hanc  doctrinam  de  populi  reditu.  Dicitur  autem  datum  fuisse  sermonem  Ieremiae  quum  adhuc  esset  in  carcere.  Ita  iubetur  propheta  consulere  suis  hostibus,  et  procurare  eorum  salutem  quantumvis  indigni  sint  propter  ingratitudinem  suam:  tametsi  enim  non  omnes  ilium  postulaverant  ad  mortem,  maior  tamen  pars  tumultuose  ipsum  damnaverat,  et  vix  fuerat  liberatus,  iacebat  in  carcere.  Haec  erat  magna  crudelitas,  quum  fideliter  exsequutus  esset  propheticum  munus,  populum  ita  adversus  eum  furere:  iubetur  tamen  adhuc  prosequi  munus  suum  et  ipsos  solari,  et  lenire  eorum  dolorem,  et  ostendere  aliquam  levationem  in  malis  et  miseriis.  Interea  dubium  non  est  quin  hoc  etiam  profuerit  Ieremiae,  quia  haec  erat  iniquissima  merces,  quum  pura  et  integra  conscientia  serviisset  Deo,  ignominiose  coniici  in  carcerem,  et  illic  tamdiu  manere  captivum.  Fuit  igitur  haec  aliqua  mitigatio  doloris,  quod  Deus  apparuit  illi  in  ipso  carcere:  nam  hoc  modo  ostendit  illum  unum  pluris  esse  quam  omnes  Iudaeos:  in  templo  non  loquutus  est  Deus  illo  tempore,  neque  in  urbe  tota.  Carcer  igitur  fuit  sacrarium  Dei,  et  illic  prophetae  suo  respondit,  quum  ante  ex  arca  foederis  et  propitiatorio  soleret.  Videmus  igitur  quantus  fuerit  hic  honor,  quod  Deus  in  carcerem  quodammodo  ingredi  tunc  dignatus  est  quum  deseruisset  templum  suum.  Iam  sequitur  vaticinium  cuius  summa  est,  quamvis  urbs  tradenda  sit  in  manum  regis  babylonii,  cladem  non  fore  perpetuam,  quia  Deus  tandem  completo  70  annorum  tempore  ipsam  restituet.  Quorsum  vero  haec  promissio  data  fuerit  alibi  diximus,  nempe  ut  fideles  patienter  se  Deo  subiicerent,  et  placidis  animis  sinerent  se  castigari,  neque  obstreperent  iusto  eius  iudicio:  deinde  ut  recumberent  in  spem  promissionis,  atque  ita  certo  statuerent  sic  Dei  manu  se  percuti,  ut  poenae  ipsae  cederent  in  medicinam,  et  adiumentum  salutis.  Nunc  ergo  tenemus  quid  contineat  prophetia,  deinde  in  quem  finem  tendat  ac  referenda  sit.  Sed  antequam  Deus  promittat  quidquam  de  reditu  populi,  praefatione  4