37:50  mus:  non  quod  divinitus  edocti  adhuc  in  utramque  partem  debeant  esse  flexibiles  :  sed  quia  superstitiosi  nihil  nisi  ridiculum  iactare  possunt.  Iterum  ergo  notatur  discrimen  stupidae  obstinationis  et  rectae  fidei  quae  suam  soliditatem  habet  in  verbo  Dei,  ne  unquam  labascat.  Iam  videndum  est  quibus  argumentis  Dei  maiestatem  asserat  propheta.  Nam  omnipotentiam,  rerumque  omnium  praescientiam  ita  sibi  vendicat  Deus,  ut  alio  transferri  sine  summo  sacrilegio  nequeant.  Unde  colligitur  sic  propria  esse  divinitatis,  ut  vere  Deus  censeri  mereatur  quisquis  novit  ac  potest  omnia.  Nunc  ergo  ita  propheta  ratiocinatur:  Si  quae  colitis  idola  sunt  dii,  oportet  ipsos  scire  et  posse  omnia:  atqui  nihil  possunt  neque  in  prosperis  neque  in  adversis,  neque  praeterita  neque  futura  tenent:  ergo  non  sunt  dii.  Hic  exoritur  quaestio  difficilis.  Multa  enim  apud  profanos  vaticinia  exstant,  quae  ab  oraculis  deorum  suorum  acceperunt,  quibus  videri  possent  Apollo,  Iupiter  et  alii  futura  praescire,  proptereaque  dii  esse.  Primum  respondeo,  si  consideremus  cuiusmodi  fuerint  illa  oracula,  quae  ab  idolis  reddita  narrantur,  omnia  obscura  aut  ambigua  fuisse  intelligemus.  Aio  te  Aeacida  Romanos  vincere  posse.  Item  alibi:  Croesus  Halym  penetrans  magnam  pervertet  opum  vim.  His  ergo  perplexis  ambagibus  Satan  torquebat  hominum  mentes,  ut  perinde  incertos  a  se  dimitteret  qui  talibus  imposturis  dediti  erant.  Sed  tenendum  praeterea  est  quod  docet  Paulus,  dari  efficaciam  erroris  Satanae,  ut  deludat  omnes  impios  qui  sponte  eius  praestigiis  se  addicunt  (2.  Thess.  2,  9).  Quum  ergo  Satanam  mendacii  patrem  consulerent  increduli,  non  mirum  fuit  decipi  praetextu  veritatis.  Sed  haec  iustissima  fuit  ingratitudinis  merces.  Videmus  laxata  fuisse  fraena  Satanae,  ut  per  falsos  prophetas  magis  excaecaret  Achab,  qui  sibi  in  talibus  praestigiis  placebat.  Non  minus  aequum  fuit  profanas  gentes,  quum  se  alienassent  a  vero  Deo,  vanis  decipulis  captari,  imo  trahi  in  exitium.  Atque  hic  supervacua  est  disputatio,  in  qua  multum  laborat  et  sudat  Augustinus,  quomodo  ad  coelestes  angelos  praescientia  daemones  accedant:  quia  causam  alibi  quam  in  eorum  natura  quaerere  convenit.  Sic  olim  Deus  fallaciis  instruens  impios  doctores  scelera  populi  sui  ultus  est:  non  quod  illi  praecellerent  dono  intelligentiae:  sed  quatenus  in  hunc  usum  aptati  erant,  grassati  sunt  permissa  sibi  licentia.  Quod  ad  Deum  ipsum  spectat,  quanquam  abscondita  est  eius  praescientia,  imo  profunda  est  abyssus  :  eam  tamen  satis  patefecit  electo  populo,  ut  se  a  falsorum  deorum  turba  eximeret.  Non  quod  omnia  praedixerit  per  suos  prophetas:  quia  et  inexplebilis  est  hominum  curiositas,  nec  utile  est  ipsis  scire  4