3:50  duellement  tormentez  de  songes  horribles  et  espovantables.  Parquoy  les  plus  meschans  nous  doyvent  servir  d'exemples  que  Dieu  se  fait  cognoistre  a  tous  hommes,  et  que  telle  impression  a  une  vigueur  qui  ne  se  peut  abolir.  3.1)  Quoy  qu'il  en  soit,  c'est-cy  un  point  resolu  à  tous  ceux  qui  iugent  iustement,  que  l'esprit  humain  a  un  sentiment  de  divinité  engrave  si  profond,  qu'il  ne  se  peut  effacer.  Mesmes  que  ceste  persuasion  soit  naturellement  enracinée  en  tous,  assavoir  qu'il  y  a  un  Dieu,  et  qu'elle  soit  attachée  comme  en  la  moelle  des  os,  la  fierté  et  rebellion  des  iniques  en  testifié,  lesquels  en  combatant  furieusement  pour  se  desvelopper  de  la  crainte  de  Dieu,  n'en  peuvent  venir  à  bout.  Un  nommé  Diagoras  anciennement  et  quelques  semblables  ont  voulu  plaisanter  en  se  moquant  de  toutes  les  religions  du  monde:  Denis  tyran  de  Sicile,  en  pillant  les  temples  s'est  moqué  comme  si  Dieu  n'y  voyoit  goutte:  mais  ces  ris  ne  passent  point  le  gosier,  pource  qu'il  y  a  tousiours  un  ver  au  dedans  qui  ronge  la  conscience,  voire  plus  asprement  que  nul  cautere.  Ie  ne  diray  pas  comme  Ciceron,  que  tous  erreurs  s'esvanouyssent  avec  le  temps,  mais  que  la  religion  croist  et  se  conferme  de  iour  en  iour:  car  à  l’opposite  nous  verrons  tantost  que  le  monde,  entant  qu'en  luy  est,  s'efforce  de  ietter  bien  loin  toute  cognoissance  de  Dieu,  et  corrompre  son  service  en  toutes  façons:  seulement  ie  dy,  combien  que  la  dureté  et  estourdissement  qu'attirent  les  meschans  et  amassent  tant  qu'ils  peuvent  pour  pouvoir  mespriser  Dieu,  croupissent  et  pourrissent  en  leur  coeur,  cependant  le  sentiment  qu'ils  ont  de  la  maiesté  de  Dieu,  lequel  ils  appetent  d'esteindre  tant  qu'il  leur  est  possible,  revient  tousiours  au  dessus.  Dont  ie