24:50  datas  esse  mulieres  Hebraeas  quod  eas  sumere  iussit  Deus,  et  quod  illis  largiri  voluit:  quia  autem  non  nisi  de  suo  largitus  est,  iniustus  non  censebitur.  Ubi  verti  hospitem,  quidam  cohabitatricem  ponunt:  nec  magnopere  ad  rem  pertinet,  quia  ex  altera  voce  colligitur  permixtos  fuisse  Hebraeis  Aegyptios.  In  fine  versus,  quia  hebraice  legitur:  Ponetis  super  filios  vestros  et  super  filias  vestras,  fere  interpretantur  omnes  Ornare.  Ego  vero  potius  arbitror  notari  magnam  opum  congeriem,  ac  si  dictum  esset:  Non  modo  impetrabitis  quantum  poteritis  humeris  gestare,  sed  onerabitis  etiam  filios  vestros  et  filias.  CAPUT  IV.  1.  Tunc  respondit  Moses,  et  dixit:  Sed  ecce  non  credent  mihi,  neque  obedient  voci  meae  quia  dicent:  Non  apparuit  tibi  Iehova.  2.  Et  dixit  ad  eum  Iehova:  Quid  est  hoc  in  manu  tua?  Et  dixit,  Baculus.  3.  Tunc  dixit:  Proiice  eum  in  terram.  Et  proiecit  in  terram,  et  factus  est  serpens  et  fugit  Moses  a  conspectu  eius.  4.  Et  dixit  Iehova  ad  Mosen  :  Extende  manum  tuam,  et  apprehende  caudam  eius.  Et  extendit  manum  suam,  et  apprehendit  eum:  et  factus  est  baculus  in  manu  eius.  5.  Ut  credant  quod  apparuerit  tibi  Iehova  Deus  patrum  ipsorum,  Deus  Abraham,  Deus  Isaac,  et  Deus  Iacob.  6.  Et  dixit  Iehova  illi  rursum:  Induc  nunc  manum  tuam  in  sinum  tuum.  Et  induxit  manum  suam  in  sinum  suum,  et  ecce  manus  eius  leprosa  quasi  nix.  7.  Et  ait:  Reduc  manum  tuam  ad  sinum  tuum.  Et  reduxit  manum  suam  ad  sinum  suum:  et  postquam  extraxit  e  sinu  suo,  ecce,  reversa  est  sicut  caro  eius.  8.  Et  erit  si  non  crediderint  tibi,  neque  obedierint  voci  signi  prioris,  credent  voci  signi  posterioris.  9.  Erit  autem,  si  non  crediderint  etiam  duobus  signis  istis,  neque  obedierint  voci  tuae,  tunc  accipies  ex  aquis  fluvii,  et  effundes  in  aridam:  et  erant  aquae  quas  sumpseris  e  fluvio,  erunt  inquam  sanguis  in  arida.  1.  Tunc  respondit.  Recitat  hoc  capite  Moses  quam  cunctanter  Deo  paruerit,  non  pervicacia,  sed  timiditate.  Neque  enim,  ut  solent  refractariae  bestiae,  iugum  excutit,  sed  huc  illuc  declinat,  ne  sibi  aptetur.  Atque  hinc  melius  perspicere  licet  quanta  infirmitate  laboraverit,  ut  fides  eius  prope  esset  suffocata.  Ab  una  quidem  parte  voluntarius  fuit  ac  propensus  ad  obsequium  :  sed  quum  arduae  difficultates  contra  obsisterent,  ex  hac  lucta  emergere  non  potuit,  donec  tergiversando  effugia  omnia  tentasset.  Nec  certe  est  cur  valde  miremur  eum  ad  tempus  restitasse  :  quum  vix  ullum  cerneret  operae  suae  pretium.  Debuit  quidem,  fateor,  clausis  4