6:5  IOANNES  CALVINUS,  FIDELIBUS  CHRISTI  MINISTRIS,  QUI  PER  FRISIAM  ORIENTALEM  PURAM  EVANGELII  DOCTRINAM  ANNUNCIANT.  1)  Quum  huc  modis  omnibus  eniti  nos  conveniat,  ut  inter  nos  reluceat  illa  quae  tantopere  a  Paulo  commendatur  fidei  unitas,  adhunc  certe  finem  potissimum  solennis  fidei  professio,  quae  baptismo  communi  annexa  est,  debebat  referri.  Proinde  hic  non  perpetuum  modo  inter  omnes  consensum  in  pietatis  doctrina  constare,  sed  unam  quoque  ecclesiis  omnibus  esse  catechismi  formam  optandum  esset.  Verum,  quia  multas  ob  causas  vix  unquam  id  poterit  obtineri,  quin  suam  quaeque  ecclesia  propriam  habeat,  non  est  vehementius  pugnandum:  modo  tamen  ea  sit  in  docendi  modo  varietas,  qua  ad  unum  Christum  dirigamur  omnes,  cuius  veritate  inter  nos  copulati  sic  in  unum  corpus  coalescamus  unumque  spiritum,  ut  eodem  simul  ore,  quaecunque  ad  fidei  summam  spectant,  praedicemus.  Ad  hunc  scopum  qui  non  intendunt  catechistae,  praeterquam  quod  dissidii  materiam  in  religione  serendo  capitaliter  nocent  ecclesiae,  impiam  quoque  baptismi  profanationem  inducunt.  Quae  enim  amplius  baptismi  utilitas,  nisi  maneat  hoc  fundamentum,  ut  consentiamus  omnes  in  unam  fidem?  Quo  diligentius  cavere  debent,  qui  catechismos  edunt  in  publicum,  ne  quid  temere  proferendo  non  in  praesens  modo  sed  etiam  ad  posteros,  tum  gravem  pietati  noxam,  tum  exitiale  ecclesiae  vulnus  infligant.  Hoc  ideo  praefari  volui,  ut  id  me  quoque,  sicuti  par  erat,  non  postremo  loco  spectasse,  testatum  esset  lectoribus,  ne  [fol.  3]  quid  in  isto  meo  catechismo  traderem,  nisi  receptae  inter  omnes  pios  doctrinae  consentaneum.  Atque  id  ipsum,  quod  profiteor,  non  vanum  esse  comperient,  qui  candorem  in  legendo  sanumque  iudicium  adhibuerint.  Certe  me  consequutum  esse  confido,  ut  labor  meus  bonis  omnibus,  si  non  satisfaciat,  gratus  tamen  sit,  ut  qui  utilis  ab  ipsis  censeatur.  Quod  autem  latinum  feci,  in  eo  si  forte  quibusdam  non  probabitur  meum  consilium,  eius  tamen  multae  rationes  mihi  constant,  quas  nunc  referre  omnes  nihil  attinet:  eas2)  tantum  eligam,  quae  ad  vitandam  reprehensionem  sufficere  videantur.  Primum  in  hoc  tam  confuso  dissipatoque  christiani  nominis  statu,  utile  esse  iudico,  exstare  publica  testimonia,  quibus  ecclesiae,  quae  longis  alioqui  locorum  spatiis  dissitae  consentientem  habent  in  Christo  doctrinam,  se  mutuo  agnoscant.  Praeterquam  enim  quod  ad  mutuam  confirmationem  non  parum  istud  valet:  quid  magis  expetendum,  quam  ut  sibi  ultro  citroque  gratulantes,  piis  votis  aliae  alias  Domino  commendent?  solebant  olim  in  hunc  finem  episcopi,  quum  adhuc  staret  inter  omnes  vigeretque  fidei  consensus,  synodales  epistolas  trans  mare  mittere  :  quibus,  tanquam  tesseris,  sacram  inter  ecclesias  communionem  sancirent.  Quanto  nunc,  in  hac  tam  horrenda  christiani  orbis  vastitate,  magis  necesse  est,  paucas  ecclesias,  quae  Deum  rite  invocant,  et  eas  quidem  dispersas,  et  undique  circumseptas  profanis  Antichristi  synagogis,  hoc  sanctae  coniunctionis  symbolum  dare  vicissim  et  accipere,  unde  ad  illum,  quem  dixi,  complexum  incitentur?  Quod  si  hoc  adeo  est  hodie  necessarium,  quid  de  posteritate  sentiemus?  De  qua  ego  sic  sum  anxius,  ut  tamen  vix  cogitare  audeam.  Nisi  enim  mirabiliter  Deus  e  coelo  succurrerit,  videre  mihi  videor  extremam  barbariem  impendere  [fol.  4|  orbi.  Atque  1)  Haec  praefatio  omittitur  m  edd.  manuahbus  1561  seqq.  2)  eas,  om.  primus  Gallasius  1552,  postea  Beza  1576  se%q_.  1