55:5  5  ARGUMENTUM.  Non  tantum  de  autore  huius  epistolae  varie  olim  disputatum  fuit,  sed  ipsa  quoque  vix  sero  recepta  fuit  in  latinis  ecclesiis.  Suspectam  habebant  quasi  Novato  suffragaretur  in  neganda  lapsis  venia:  sed  quam  vana  fuerit  illa  suspicio,  suis  locis  tractabitur.  Ego  vero  eam  inter  apostolicas  sine  controversia  amplector  :  nec  dubito  Satanae  artificio  fuisse  quondam  factum  ut  illi  autoritatem  quidam  detraherent.  Nullus  enim  est  ex  sacris  libris  qui  de  Christi  sacerdotio  tam  luculente  disserat,  unici  quod  morte  sua  obtulit  sacrificii  vim  dignitatemque  tam  magnifice  extollat,  de  caeremoniarum  tam  usu  quam  abrogatione  uberius  tractet:  qui  denique  plenius  explicet  Christum  esse  finem  legis.  Quare  ne  patiamur  Dei  ecclesiam  et  nos  ipsos  tanto  bono  spoliari:  sed  eius  possessionem  constanter  nobis  asseramus.  Quis  porro  eam  composuerit,  non  magnopere  curandum  est.  Putarunt  alii  Paulum  esse,  alii  Lucam,  alii  Barnabam,  alii  Clementem,  ut  refert  Hieronymus.  Quamquam  Lucae  tantum  et  Clementis  Eusebius  meminit,  libro  sexto  ecclesiasticae  Historiae.  Scio  Chrysostomi  tempore  passim  inter  paulinas  a  Graecis  fuisse  receptam.  Sed  Latini  aliter  senserunt:  praesertim  qui  propriores  fuerunt  apostolorum  temporibus.  Ego  ut  Paulum  agnoscam  autorem,  adduci  nequeo.  Nam  qui  dicunt  nomen  fuisse  de  industria  suppressum,  quod  odiosum  esset  Iudaeis,  nihil  afferunt.  Cur  enim  mentionem  fecisset  Timothei,  si  ita  esset?  Hoc  enim  indicio  se  prodebat.  Sed  ipsa  docendi  ratio  et  stylus  alium  quam  Paulum  esse  satis  testantur:  et  scriptor  ipse  unum  se  ex  apostolorum  discipulis  profitetur,  capite  secundo:  quod  est  a  paulina  consuetudine  longe  alienum.  Praeterea  quae  de  catechismi  consuetudine  adducit  capite  6,  Pauli  aetati  minus  congruerent.  Alia  sunt  quae  suis  locis  adnotabimus.  Scio  qualis  de  stylo  excusatio  adduci  soleat:  non  posse  scilicet  iudicium  inde  fieri,  eo  quod  epistolam  hanc  ex  hebraica  lingua  in  graecam  vel  Lucas,  vel  alius  quispiam  transtulerit.  Atqui  ea  coniectura  nullo  negotio