35:5  5  IOB  CHAP.  XXXII.  6  (comme  nous  avons  dit)  qu'ils  l'ont  mal  appropriee:  mais  cependant  si  est-ce  qu'il  y  a  eu  un  esprit  excellent  en  eux.  Et  de  fait  (comme  nous  avons  declare)  ce  qui  a  este  deduit  ci  dessus  ne  doit  pas  estre  autrement  receu  que  de  l'escole  du  sainct  Esprit.  Or  combien  que  ces  personnages  ici  fussent  si  excellens,  si  est-ce  qu'ils  n'avoyent  point  este  instruits  en  la  Loi  de  Moyse,  ils  estoyent  separez  de  l'Eglise  de  Dieu:  car  si  la  Loi  estoit  publiee  de  ce  temps-la  (ce  qui  est  incertain)  si  est-ce  qu'ils  estoyent  bien  destournez  de  ce  pays  de  Iudee,  et  n'avoyent  la  nulle  communication,  pour  estre  participans  de  la  doctrine  que  Dieu  avoit  simplement  destinee  a  son  peuple.  Nous  voyons  donc  des  gens  qui  n'avoyent  eu  nulle  Escriture,  qui  n'avoyent  eu  sinon  la  doctrine  que  Noe  ou  ses  enfans  avoyent  publiee  apres  le  deluge:  nous  voyons  ceux-la  .estre  Prophetes  de  Dieu,  avoir  un  esprit  excellent:  et  combien  qu'ils  habitassent  en  divers  pays,  toutes  fois  si  voyons  nous  comme  Dieu  leur  avoit  donne  une  cognoissance  qui  pouvoit  estre  pour  edifier  tout  le  commun  peuple.  Voila  donc  comme  le  monde  n'a  peu  estre  excuse  en  son  ignorance:  car  combien  que  l'idolatrie  ait  regne  du  temps  de  Thare  et  de  Nachor,  et  qu'eux-mesmes  ayent  este  idolatres  (comme  il  est  dit  au  dernier  chapitre  du  livre  de  Iosue)  et  que  ceux  qui  en  estoyent  descendus  les  ensuivissent:  si  est  ce  que  cest  Eliu  qui  estoit  de  la  famille  de  Ram,  et  ces  trois  autres  ont  este  exempts  des  corruptions  communes  de  ce  temps-la:  tellement  que  nous  voyons  que  la  pure  religion  n'a  point  este  abolie  entre  eux:  mais  qu'il  y  a  eu  une  doctrine  suffisante  pour  les  mener  a  Dieu,  et  pour  convaincre  le  monde  de  son  obstination,  et  de  l'ignorance  en  laquelle  il  a  este.  Voila  ce  que  nous  avons  a  noter  en  premier  lieu.  Et  ainsi  quand  nous  oyons  qu'il  est  dit,  que  Dieu  a  laisse  cheminer  les  hommes  en  perdition,  notons  bien  que  c'est  d'autant  qu'il  n'a  point  fait  ceste  grace  a  tous  de  leur  donner  la  doctrine  especiale  qu'il  avoit  reservee  a  son  peuple  et  a  son  Eglise:  mais  ce  n'est  pas  pour  les  excuser.  Dieu  donc  a  laisse  courir  les  hommes  a  l'esgaree,  et  se  sont  tous  abysmez  en  perdition:  mais  tant  y  a  qu'il  est  demeure  quelque  semence  en  leurs  coeurs,  et  qu'ils  ont  este  convaincus,  tellement  qu'ils  ne  pouvoyent  pas  dire,  Nous  ne  savons  que  c'est  de  Dieu,  nous  n'avons  eu  nulle  religion:  d'autant  que  nul  ne  s'en  pouvoit  exempter:  car  cela  est  demeure  engrave  en  la  conscience,  que  le  monde  ne  s'estoit  point  forme  de  soi,  qu'il  y  avoit  quelque  maieste  celeste  a  laquelle  il  se  faut  assuiettir.  Vrai  est  que  sainct  Paul  (Rom.  1,  20)  parle  notamment  du  tesmoignage  que  Dieu  a  imprime  aux  creatures,  d'autant  que  l'ordre  du  monde  est  comme  un  livre  qui  nous  enseigne,  et  nous  doit  mener  a  Dieu:  mais