3:5  5  IEAN1)  CALVIN  AU  LECTEUR.  Pource  qu'en  la  premiere  edition  de  ce  livre  ie  n'attendoye  pas  qu'il  deust  estre  si  bien  receu  comme  Dieu  l’a  voulu  par  sa  bonté  inestimable,  ie  m'en  estoye  acquitté  plus  legerement,  m'estudiant  à  brieveté:  mais  ayant  cogneu  avec  le  temps  qu'il  a  esté  recueilly  de  telle  faveur  que  ie  n'eusse  pas  osé  desirer,  tant  s'en  faut  que  ie  l'esperasse:  ie  me  suis  senty  d'autant  plus  obligé  de  m'acquitter  mieux  et  plus  pleinement  envers  ceux  qui  recevoyent  ma  doctrine  de  si  bonne  affection,  pource  que  c'eust  esté  ingratitude  à  moy,  de  ne  point  satisfaire  à  leur  desir  selon  que  ma  petitesse  le  portoit.  Parquoy  i'ay  tasché  d'en  faire  mon  devoir:  non  seulement  quand  ledit  livre  a  esté  imprimé  pour  la  seconde  fois,  mais  toutes  fois  et  quantes  qu'à  la  rimprime2),  il  a  esté  aucunement  augmenté  et  enrichy.  Or  combien  que  ie  n'eusse  point  occasion  de  me  desplaire  au  travail  que  i'y  avoye  pris,  toutesfois  ie  confesse  que  iamais  ie  ne  me  suis  contenté  moymesme,  iusques  à  ce  que  ie  l'ay  eu  digeré  en  l'ordre  que  vous  y  verrez  maintenant,  lequel  vous  approuverez,  comme  i'espere.  Et  de  fait,  ie  puis  alleguer  pour  bonne  approbation,  que  ie  ne  me  suis  point  espargné  de  servir  à  l'Eglise  de  Dieu  en  cest  endroit,  le  plus  affectueusement  qu'il  m'estoit3)  possible:  en  ce  que  l’hyver  prochain,  estant  menacé  par  la  fievre  quarte  de  partir  de  ce  monde,  d'autant  plus  que  la  maladie  me  pressoit,  ie  me  suis  d'autant  moins  espargné,  iusques  à  ce  que  i'eusse  parfait  le  livre,  lequel  survivant  apres  ma  mort  monstrast  combien  ie  desiroye  satisfaire  à  ceux  qui  desia  y  avoyent  profité,  et  desiroyent  d'y  profiter  plus  amplement.  Ie  l'eusse  bien  voulu  faire  plustost:  mais  ce  sera  assez  tost,  si  assez  bien:  et  quant  à  moy,  il  me  suffira  qu'il  ait  apporté  fruict  à  l'Eglise  de  Dieu,  encores  plus  large4)  que  par  cy  devant.  Voila  mon  seul  souhait:  comme  aussi  de  fait  ie  seroye  bien  mal  recompensé  de  mon  labeur,  si  ie  ne  me  contentoye  estre  approuvé  de  mon  Dieu,  pour  mespriser  les  folles  opinions  et  perverses  des  ignorans,  ou  les  calomnies  et  detractions  des  malins.  Car  combien  que  Dieu  ait  du  tout  attaché  mon  coeur  à  une  droite  affection  et  pure  d'augmenter  son  regne,  et  servir  à  l'utilité  de  son  Eglise:  que  ma  conscience  me  rende  bon  et  certain  tesmoignage  devant  luy  et  devant  ses  Anges,  que  ie  n'ay  eu  autre  intention  depuis  qu'il  m'a  donné  ceste  charge  et  office  d'enseigner,  sinon  de  profiter  à  son  Eglise  en  declarant  et  maintenant  la  pure  doctrine  qu'il  nous  a  apprise:  toutesfois  ie  ne  pense  point  qu'il  y  ait  homme  sur  la  terre  qui  soit  plus  assailly,  mors  et  desciré  par  fausses  detractions,  tant  des  ennemis  manifestés  de  la  verité  de  Dieu,  que  de  beaucoup  de  canailles  qui  se  sont  fourrez  en  son  Eglise:  tant  des  Moynes  qui  ont  apporté  leurs  frocs  hors  de  leurs  cloistres  pour  infecter  le  lieu  où  ils  venoyent,  que  d'autres  villains  qui  ne  vallent  pas  mieux  qu'eux.5)  Sans  aller  plus  loing,  desia  ceste  Epistre  estoit  sous  la  presse  quand  i'ay  receu  cer-