27:5  5  LE  PREMIER  SERMON  SUR  LE  CHAP.  X.  V.  1.8.  DU  MARDI  10E  DE  SEPTEMBRE  1555.  Nous  avons  desia  veu  par  ci  devant  ce  qui  est  ici  recite  par  Moyse,  c'est  assavoir  que  Dieu  pour  la  seconde  fois  a  escrit  les  dix  commandemens  de  sa  Loy  en  deux  tables  de  pierre:  et  c'est  afin  que  le  peuple  pensast  tant  mieux  que  l'alliance  que  Dieu  a  contractee  avec  luy,  est  de  sa  pure  misericorde.  Car  nous  avons  veu  que  Dieu  avoit  quitte  le  peuple:  et  ainsi  c'est  autant  comme  s'ils  estoyent  mis  au  rang  commun  des  hommes  qui  sont  du  tout  maudits,  et  alienez  de  Dieu.  Vray  est  que  desia  c'estoit  de  la  bonte  gratuite  de  Dieu,  que  le  peuple  avoit  este  choisi:  car,  comme  nous  avons  veu,  nul  d'entre  eux  n'estoit  nay  quand  Dieu  avoit  fait  la  promesse  a  son  serviteur  Abraham:  il  faut  donc  qu'ils  recognoissent  que  ce  n'a  point  este  a  cause  de  leurs  merites  que  Dieu  les  a  eleus.  Mais  d'autant  que  les  hommes  taschent  tant  qu'il  leur  est  possible  d'obscurcir  la  grace  de  Dieu,  et  qu'ils  cerchent  des  petites  inventions,  et  frivoles,  pour  attribuer  a  eux  quelque  partie  de  leur  salut  :  il  a  fallu  que  ceci  fust  pleinement  remonstre,  c'est  assavoir  que  Dieu  pour  la  seconde  fois  recoit  ce  peuple  a  merci,  sans  avoir  aucun  esgard  a  luy,  s'il  en  est  digne,  ou  non:  mais  que  cela  procedoit  de  sa  pure  bonte.  Les  hommes  pensent  que  Dieu  ait  preveu  quels  ils  doivent  estre,  quand  il  les  elit:  comme  nous  voyons  que  cest  erreur  diabolique  a  tousiours  regne,  et  encores  maintenant  d'aucuns  phantastiques  voudroyent  que  l'election  de  Dieu  fust  fondee  sur  sa  prescience,  c'est  a  dire,  quand  Dieu  a  eleu  ceux  qu'il  luy  a  pleu  devant  le  creation  du  monde,  ils  viennent  gloser  la  dessus,  qu'il  a  cogneu  ceux  qui  en  seroyent  dignes,  et  qu'il  les  a  marquez  :  et  pour  ceste  cause  qu'il  les  a  preferez  a  ceux  qu'il  a  cogneu  devoir  estre  meschans.  Or  cela  est  tout  au  rebours  de  ce  que  l'Escriture  enseigne:  car  elle  monstre  que  Dieu  prend  en  soy  la  cause  de  nous  elire,  c'est  a  dire,  de  sa  pure  grace.  Car  il  ne