26:5  5  LE  PREMIER  SERMON  SUR  LE  CHAP.  II.  V.  1-7.  DU  IEUDI  25E  D'AVRIL  1555.  Ici  nous  voyons  plus  a  plein  la  pratique  de  ce  qui  fut  hier  traitte,  c'est  assavoir,  que  Dieu  en  chastiant  les  hommes,  les  apprent  a  obeir:  et  par  ce  moyen  les  tient  comme  par  force,  d'autant  qu'ils  ne  veulent  point  s'assuiettir  a  luy  de  leur  bon  gre.  Secondement,  qu'il  esprouve  leur  obeissance,  les  faisant  reculer,  au  lieu  que  de  nostre  nature  nous  ne  demandons  sinon  de  nous  advancer,  et  nous  faire  valoir.  Moyse  donc  dit:  Que  ce  peuple  tourna  bride  apres  avoir  este  ainsi  battu  de  ses  ennemis.  Auparavant  on  ne  le  pouvoit  dompter  en  facon  que  ce  fust.  Dieu  luy  commandoit  bien  ce  qui  estoit  de  faire:  mais  nous  avons  veu  la  rebellion.  S'il  disoit:  Tenez  vous  coys;  ils  estoyent  bouillants,  et  vouloyent  ruer  contre  leurs  ennemis.  S'il  disoit:  Ne  marchez  point:  ils  vouloyent  courir  plus  viste  beaucoup  qu'auparavant.  Or  sont-ils  enseignez  a,  leurs  despens?  Dieu  a-il  accompli  sa  menace,  quand  il  les  a  fait  desconfire  par  leur  ennemis?  les  voila  maintenant  dociles:  mais  c'est  trop  tard.  Comme  un  fol  iamais  ne  sera  instruit,  sinon  qu'il  ait  senti  le  mal,  comme  on  dit  en  proverbe.  Or  par  cela  nous  sommes  admonnestez  combien  il  nous  est  utile  d'estre  ainsi  maniez.  Oar  sans  que  Dieu  nous  reduist  a  soy  par  correction:  il  seroit  impossible  que  nous  luy  fussions  tels  qu'il  appartient  pour  escouter  sa  voix,  et  pour  suyvre  la  ou  il  nous  commande.  Il  faut  donc  que  nous  soyons  preparez  a  coups  de  verges.  Et  au  reste,  apprenons  bien  ce  qui  a  desia  este  declare,  comme  Moyse  nous  le  monstre  aussi  a  l'oeil:  c'est  assavoir,  que  Dieu  permettra  que  nous  languissions,  encores  qu'il  nous  soit  propice,  et  qu'il  nous  ait  pardonne  les  pechez  que  nous  avons  commis:  si  est-ce  qu'il  nous  faudra  souffrir  pour  quelque  espace  de  temps.  Nous  gemirons  a  luy,  et  il  nous  laissera  en  nostre  estat,  et  en  nostre  condition  miserable:  mais  en  la  fin  le  tout  reviendra  a  nostre  profit.  Car  si  Dieu  eust  ouvert  la  porte  au  peuple  d'Israel,  et  qu'il