40:499  499  PRAELECTIONES  500  genuinum  cultum.  Conatus  enim  est  subinde  ipsos  ad  se  retrahere  quum  videbat  eos  vagari  post  suas  superstitiones.  Quum  ergo  saepius  imo  propemodum  assidue  obiurgati  fuerint  a  prophetis,  hinc  melius  deprehensa  fuit  eorum  contumacia,  quod  nihilominus  sequuti  sint  suos  illos  perversos  cultus.  Quia  ergo  inutiles  fuerunt  omnes  illae  obiurgationes,  hic  Deus  amplificat  eorum  crimen,  quod  surdi  fuerint.  Dixi  igitur,  nempe  per  prophetas.  Scimus  enim  quam  sedulo  prophetae  incubuerint  in  hanc  partem,  ut  in  unum  solum  altare  respicerent.  Et  hac  ratione  crevit  eorum  scelus,  quod  quum  Deus  diceret,  Quid  hoc?  et  quomodo  tantopere  expetitis  vestra  excelsa  quum  mihi  displiceant,  et  sciatis  quid  vobis  praeceperim?  aures  fuerunt  surdae  vel  malitia  obstructae.  In  summa,  rogat  quorsum  eos  rapiat  vesania,  quum  ingrediuntur  excelsa:  quando  locum  designavit,  ubi  esset  quaerendus  et  invocandus.  Atrium,  inquit,  meum  negligitur:  interea  curritis  ad  excelsa:  et  tamen  excelsum  vocatum  est  eius  nomen.  Nullum  mysterium  subest  in  ipsa  voce:  sed  significat  Deus  nullis  prophetarum  obiurgationibus  vel  minis  fieri  potuisse,  quin  populus  celebraret  sua  excelsa.  Dicit  igitur  vocatum  fuisse  nomen,  quoniam  eadem  dignitas  et  religio  viguerit  in  illis  excelsis.  Debuerat  aboleri  prorsus  memoria.  Si  tantum  semel  pronuntiasset  Deus  excelsa  illa  sibi  non  probari,  omnes  debuerant  statim  resipiscere:  clamavit  diu  et  vehementer  per  suos  prophetas:  interea  nomen  excelsorum  volitavit  per  omnium  ora.  Fuit  celebre,  quasi  illic  quaerendus  esset  Deus.  Nunc  ergo  videmus  damnari  Iudaeos  nimiae  superbiae,  quod  non  solum  sua  excelsa  non  reliquerint  quum  fuissent  diligenter  admoniti,  sed  quod  pertinaciter  voluerint  Dei  sanctuario  opponere  loca  illa,  quae  tamen  totidem  erant  pollutiones.  Hinc  colligimus  damnari  obstinatam  populi  malitiam,  quod  patres  filiis  nomen  illud  tradiderint,  ita  ut  continua  serie  excelsa  opposuerint  unico  Dei  sanctuario.  Sequitur,  30.  Propterea  dic  ad  domum  Israel,  Sic  dicit  dominator  Iehovah,  An  in  via  patrum  vestrorum  vos  polluti  estis?  et  post  idola  ipsorum  (vel  spurcitias)  vos  scortamini?  Nunc  tandem  propheta  eos  a  quibus  consultus  fuerat  recta  aggreditur.  Postquam  ostendit  progenitos  esse  ex  impiis  patribus,  et  id  plus  satis  fuisse  manifestum,  quod  ab  initio  usque  ad  finem  non  destiterint  singulis  aetatibus  Deum  provocare:  iam  convertit  ad  ipsos  suum  sermonem,  et  rogat  an  polluti  sint  in  superstitionibus  patrum.  Vetus  interpres  transtulit,  certe:  sed  n  interrogationis  nota  id  non  patitur.  Miror  tamen  quid  aliis  interpretibus  venerit  in  mentem,  ut  dicerent,  annon  polluimini,  quasi  esset  scriptum  Nibn.  Atqui  si  recte  iudico,