40:498  modo  sit  colendus.  Ubi  hoc  homines  sibi  arrogant,  perinde  est  ac  si  conscenderent  Dei  ipsius  tribunal.  Si  autem  sequantur  aliorum  figmenta,  eos  igitur  sibi  praeficiunt  legislatores:  interea  Deus  e  suo  gradu  deiicitur.  Itaque  mirum  non  est,  si  provocatur  ira  Dei  omnibus  sacrificiis,  quae  fiunt  praeter  legis  praescriptum.  Et  hoc  clarius  exprimitur  apud  Isaiam  (29,  14),  ubi  Deus  pronuntiat  se  facturum  quod  omnes  exterreat,  et  quod  sit  insoliti  prodigii  loco,  Excaecabo  oculos  sapientum,  inquit,  et  auferam  a  senibus  prudentiam.  Quare?  coluerunt  enim  me  praeceptis  hominum.  Sequitur,  Et  obtulerunt  suavem  odorem,  vel  bonae  fragrantiae.  Videntur  haec  duo  pugnare,  quod  oblationes  Dei  vindictam  accenderint,  et  tamen  suavis  fuerit  earum  redolentia.  Sed  ironice  loquitur  propheta  quum  dicit  suffitus  eorum  fuisse  boni  odoris.  Per  concessionem  igitur  ipsos  deridet,  quia  falso  putaverint  hoc  modo  placari  Deum.  Quanquam  simul  eos  perstringit,  quod  suffitum  qui  debuerat  esse  bonae  fragrantiae  reddiderint  foetidum  suis  corruptelis.  Nam  repetitur  subinde  apud  Mosen  haec  sententia,  Odor  ille  perveniet  ad  nares  Dei,  et  placabitur.  Quum  ergo  suffitus  legales  essent  bonae  fragrantiae,  Deus  hic  non  sine  acerbitate  Iudaeos  perstringit,  quod  foetore  suo  infecerint  bonum  ilium  odorem:  ita  esset  antiphrasis.  Denique  inquit,  fuderunt  illic  sua  libamina.  Hic  recenset  Deus  varias  oblationum  species,  de  quibus  diserte  in  lege  praeceperat:  sed  in  omnibus  ostendit  Iudaeos  fuisse  immorigeros:  et  interea  melius  detegit  quam  effraenis  fuerit  ipsorum  petulantia,  quod  non  una  tantum  in  parte  violaverint  legem,  sed  nullam  partem  intactam  reliquerint  a  suis  superstitionibus.  Deus  mandaverat  sacrificia,  in  sacrificiis  polluti  sunt  Iudaei.  Iam  addiderat  varias  oblationes,  nulla  fuit  oblatio  quam  non  conspurcaverint.  Instituerat  suffitus,  illos  etiam  corruperunt  :  libamina  volebat  sibi  offerri,  hoc  est  vinum  fundi:  neque  haec  pars  pura  fuit  a  superstitionibus.  Modis  itaque  omnibus  ostendit,  populum  hunc  quasi  data  opera  bellum  gessisse  cum  Deo,  quum  tamen  fallaciter  obtenderet,  sibi  nihil  magis  esse  propositum  quam  ipsum  colere.  Sequitur,  29.  Et  dixi  illis,  ut  quid  (quorsum,  vel  quodnam  est)  excelsum  quod  vos  ingredimini?  (vel  quia  vos  illuc  ingredimini),  et  vocatum  fuit  nomen  eius  excelsum  usque  ad  hunc  diem.  Quamvis  nulla  sit  ambiguitas  in  verbis  prophetae,  videtur  tamen  frigere  haec  sententia:  et  interpretes,  meo  iudicio,  non  assequuti  sunt  quidnam  propheta  vellet.  Frigidum  per  se  posset  videri  quod  Deus  interrogat,  quodnam  est  excelsum?  Sed  significat  non  fuisse  ignorantia  deceptos,  quia  subinde  ipsos  admonuerit,  ne  ita  profanarent  verum  et  32