39:498  positione,  Seraiam  fuisse  legatum  regis,  qui  tolleret  offensas  a  Babyloniis  conceptas.  Hoc  autem  factum  fuit  quarto  anno  Zedechiae.  Iam  quum  nominat  Seraiam  principem  quietis,  non  dubito  quin  hoc  ad  mansuetudinem  eius  referri  debeat,  et  miror  in  re  tam  perspicua  interpretes  anxie  sudare:  alius  vertit,  nempe  Chaldaeus,  principem  oblationum,  quasi  praefuerit  muneribus  quae  offerebantur  regi:  alii  divinant  fuisse  hominem  facetum,  qui  regem  in  metu  oblectaret.  Alii  vero  principem  quietis  putant  vocari,  quia  continuerit  urbem  in  statu  tranquillo:  sed  illa  omnia  sunt  violenta.  Mihi  igitur  non  aliud  potest  probari  quam  hunc  principem  fuisse  quietum.  Non  igitur  referri  debet  ad  officium  hoc  nomen  quietis,  sed  genitivus  accipitur  loco  epitheti,  quod  fuerit  princeps  ille  tranquillus,  hoc  est?  ingenio  placido.  Et  non  abs  re  addita  fuit  haec  commendatio:  quia  scimus  quam  fastuose  respuant  proceres  si  quid  mandatur  a  servis  Dei.  Poterat  excipere  Seraiah  se  mitti  Babylonem  non  ab  homine  privato  et  gregario,  sed  ab  ipso  rege:  poterat  ergo  superbe  obiurgare  prophetam,  quod  nimis  licentiae  sibi  arriperet,  Quisnam  tu  es?  quod  audes  mihi  praecipere,  quum  sustineam  personam  regis,  et  eius  nomine  venturus  sim  ad  regem  Babylonis?  deinde  tu  hic  omnia  perturbas  quum  iubes  me  legere  hoc  volumen:  quid  si  apud  me  deprehensum  fuerit?  quid  si  aliqui  suspicati  fuerint  me  tale  aliquid  ferre  Babylonem:  ego  primum  ferrem  mortem  meam  in  sinu,  deinde  essem  perfidus  regi  meo:  nam  hoc  modo  tota  legatio  esset  plus  quam  odiosa.  Quum  ergo  Seraiah  posset  haec  omnia  colligere  ad  repudiandum  mandatum,  quod  dabat  Ieremias,  ideo  exprimitur  eius  mansuetudo,  quod  scilicet  fuerit  homo  placidus,  et  qui  non  detractaret  talem  provinciam,  qui  esset  denique  paratus  ad  praestandum  Deo  et  servo  eius  obsequium.  In  summa  laudatur  hic  docilitas  Seraiae,  quod  tanta  facilitate  admiserit  prophetam,  quod  passus  fuerit  ab  eo  sibi  praecipi:  deinde  quod  etiam  non  dubitaverit  exsequi  quod  mandabat,  quum  tamen  esset  id  capitale:  praesertim  quum  esset  valde  adversum  legationi,  ubi  rex  Babylonis  reconciliandus  erat.  Et  certe  hoc  exemplum  observatu  dignum  est,  quod  Seraiah  neque  periculo  fuit  absterritus,  quin  cito  prophetae  mandato  pareret,  neque  etiam  se  ipsum,  vel  iniunctum  sibi  munus  respexit,  ut  pro  communi  more  procerum,  honoris  sui  praetextu  reiiceret  prophetam  :  sed  deposita  persona,  et  oblitus  omnis  suae  magnitudinis,  fuerit  discipulus  Ieremiae,  qui  tamen,  ut  satis  notum  est,  pridem  coeperat  contemni  a  populo,  et  aliquoties  fere  ad  mortem  protractus  fuerat.  Est  igitur  insigne  hoc  elogium  virtutis  in  Seraiah,  quod  tanta  modestia  et  facilitate  amplexus  est  quidquid  a  propheta  dictum  fuerat,  et  certo  vitae  discrimine  obedivit  eius  mandato.  Nunc  sequitur,  32