55:496  13.  Undae  efferatae  maris.  Quorsum  hoc  additum  sit,  melius  ex  Petri  verbis  colligere  licet:  nempe  quod  inflati  superbia,  magni  loco  stylo  verborum  ampullas  efflant,  vel  potius  despumant.  Interea  adeo  nihil  afferunt  spirituale,  ut  potius  homines  deiiciant  ad  brutorum  animalium  stuporem.  Tales  (ut  prius  dictum  est)  hodie  sunt  fanatici  homines  qui  se  Libertinos  vocant.  Dicas  mera  eos  tonitrua  sonare:  nam  communi  sermone  spreto,  exoticum  nescio  quod  idioma  sibi  fingunt:  postquam  visi  sunt  suos  discipulos  supra  coelum  rapere,  repente  in  belluinos  errores  procidunt.  Pingunt  enim  innocentiae  esse  statum,  ubi  nullum  discrimen  est  turpis  et  honesti:  fingunt  spiritualem  esse  vitam,  dum  exstincto  metu,  secure  sibi  quisque  indulget:  nos  fieri  deos,  quia  spiritus  ex  corporibus  migrantes  Deus  absorbeat.  Quo  maiore  studio  ac  reverentia  nobis  colenda  est  scripturae  simplicitas,  ne  argutius  quam  par  est  philosophando,  non  coelo  appropinquemus,  sed  potius  in  multiplices  labyrinthos  mergamur.  Ideo  s  t  e  l  l  a  s  errat  i  c  a  s  vocat,  quia  evanida  lucis  specie  oculos  perstringant.  14.  Prius  autem  etiam  iis  vaticinatus  est  septimus  ab  Adam  Enoch,  dicens:  Ecce  venit  Dominus  in  sanctis  millibus  suis,  15.  Ut  faciat  iudicium  adversus  omnes,  et  redarguat  ex  eis  omnes  impios  de  factis  omnibus  impietatis  quae  impie  patrarunt,  deque  omnibus  duris  quae  loquuti  sunt  adversus  Deum  peccatores  impii.  16.  Hi  sunt  murmuratores,  queruli,  iuxta  concupiscentias  suas  ambulantes,  et  os  illorum  loquitur  tumida,  admirantes  personas,  utilitatis  gratia.  14.  Prius  autem,  ete.  Vaticinium  hoc  potius  aypa  fuisse  puto  quam  ex  apocrypho  libro  adductum.  Fieri  enim  potest  dictum  hoc  memorabile  veteres  commendarint  posteris.  Si  quis  roget,  quum  passim  occurrant  in  scripturis  non  absimiles  sententiae,  cur  non  ex  aliquo  propheta  scriptum  testimonium  citaverit:  solutio  in  promptu  est,  voluisse  ab  ultima  vetustate  repetere  quid  spiritus  de  illis  pronuntiaverit.  Atque  hoc  verba  sonant.  Septimum  enim  ab  Adam  nominatim  dicit,  ut  vaticinii  antiquitatem  commendet:  quod  scilicet  iam  priore  mundo  exstiterit.  Quod  autem  prophetiam  hanc  dixi  ex  relatu  notam  fuisse  Iudaeis,  si  quis  aliter  sentiat,  non  contendo:  sicut  nec  de  epistola  quidem,  sitne  Iudae,  an  alterius  cuiuspiam.  Tantum  in  rebus  dubiis  quod  probabile  est,  sequor.  Ecce  venit.  Praeteritum  loco  futuri,  more  prophetico.  Dicit  venturum  in  sanctorum  millibus:  sub  quibus  verbis  tam  fideles  quam  angelos  designat.  Nam  ornabunt  utrique  Christi  tribunal