5:496  catholicorum,  qui  in  privatis  tractatibus  aliquid  vel  approbare  vel  permittere  possent,  vel  forte  ipsis  invitis  decerneretur,  quod  esset  in  magnam  Dei  offensionem  et  animarum  perniciem,  ut  supra  dictum  est.  Eant  nunc  qui  pontificem  negant  de  servandi??conscientiis  esse  sollicitum.  Ne  quid  enim  suscipienda  ecclesiae  reformatione  peccent  pii  principes,  et  in  eo  conscientiam  suam  saucient,  mavult  hanc  conscientiam  coram  Deo  et  hominibus  sustinere,  ut  se  autore  non  solum  non  corrigantur  manifesta  vitia,  quae  in  ecclesiam  invaserunt,  sed  quotidie  etiam  augeantur.  Quid  enim  aliud  est  correctionem  reiicere  in  concilium,  quam  omne  corrigendi  studium  prorsus  abiicere?  Ac  bellum  certe  argumentum  obtenditur:  possent  aliquid  approbare,  vel  concedere  principes,  posset  aliquid  invitis  ipsis  decerni,  quod  in  magnam  cederet  Dei  offensionem  et  animarum  perniciem.  Id  ergo  periculi  ut  vitent,  concilio  melius  est  omnia  corrigenda  delegare.  Eius  porro  convocandi  arbitrium  penes  pontificem  sit:  quis  enim  dubitet  fideliter  daturum  operam,  ut  primo  quoque  die  cogatur?  Nempe  indictionem  saltem  mantuanam  promulgabit,  quae  mox  in  fumum  abeat.  Iam  nimis  meticulosi  sunt  principes,  nisi  se  omni  religione  solutos  credant,  ubi  in  tam  fidelem  vicarium  se  exoneraverint.  Nihil  enim  dubium  est,  quin  sic  a  iudicio  Dei  liberentur.  Atqui  periculum  illud,  quod  iste  [fol.  37]  tam  formidabile  facit,  ne  quid  perperam  decernatur  aut  concedatur,  quale  est  hoc  tempore?  Petunt  enim  protestantes,  ut  ad  normam,  quam  semel  Deus  per  apostolos  posuit  et  sanguine  Christi  sui  confirmavit,  ecclesiae  reformentur.  An  evangelium  quod  Deus  omni  creaturae  voluit  praedicari  tam  obscurum  est,  ut  nesciatur  quo  nos  ducat?  Nonne  exemplar  quod  sequamur  habemus  in  veteri  et  puriore  ecclesia?  Nonne  exstant  et  decreta  veterum  conciliorum  et  patrum  sententiae  satis  clarae,  quae  adiuvare  nos  et  quasi  dirigere  ad  scopum  poterunt?  Ad  haec  an  putamus  fallere  Christum,  quum  spiritum  suum  pollicetur  omnibus,  qui  ex  corde  ipsum  invocaverint?  Tot  adminiculis  quum  nos  Dominus  confirmet,  hoc  unum  terriculamentum  nos  percellet,  ne  opem  ferre  ecclesiae  extremo  periculo  laboranti  audeamus,  timendum  esse,  ne  quid  perperam  inconsulto  romano  pontifice  fiat.  Interim  quum  tota  ferme  religio  apud  homines  collapsa,  ad  extremam  quodammodo  ruinam  inclinet,  quum  ecclesia  lacera  et  discerpta  fidem  nostram  imploret,  sponsione  pontificis  suffulti  securis  animis  connivebimus?  Quod  si  ad  concilium  reiectum  erit,  maiestates  suae  et  reliqui  omnes  vacabunt  omni  culpa.  Quasi  vero  unquam  habendum  sit,  si  potestas  illis  demandetur.