35:496  porte  et  n'a  point  d'esgard  a  nos  infirmitez  et  nos  vices,  pour  les  condamner  sans  remission.  Et  voila  pourquoi  il  est  dit  en  l'Escriture,  que  ceux  qui  se  sont  employez  a  servir  a  Dieu  et  garder  sa  Loi,  sont  iustes:  comme  Zacharie  et  Elizabeth  ont  este  iustes  devant  Dieu.  Comment  iustes?  Ou  est  l'homme  qui  se  trouvera  tel?  comme  il  est  dit  au  Pseaume.  Ne  faut-il  pas  que  nous  soyons  tous  condamnez  comme  povres  pecheurs,  et  que  nous  ayons  tous  la  bouche  close?  Ouy  bien.  Mais  outre  ce  que  Dieu  avoit  receu  Zacharie  et  Elizabeth  pour  les  gouverner  par  son  S.  Esprit:  il  accepte  aussi  ce  qu'ils  desirent  de  bien  faire,  comme  s'il  n'y  avoit  que  perfection  en  nos  desirs  qui  sont  imparfaits.  L'obeissance  n'est  pas  telle  comme  il  seroit  requis:  mais  tant  y  a  que  Dieu  la  recoit,  d'autant  qu'il  n'impute  point  a  ceux  qui  desirent  de  le  servir,  toutes  les  imperfections  qui  sont  en  eux.  Et  voila  pourquoi  il  les  accepte  comme  iustes.  Or  donc  combien  qu'il  y  aura  des  fautes  en  nous,  Dieu  les  mettra  en  oubli,  elles  seront  ensevelies  par  sa  misericorde:  tellement  qu'il  ne  laissera  pas  de  nous  accepter  comme  iustes  et  droits,  moyennant  que  nostre  coeur  tende  la  (comne  nous  avons  dit)  de  l'honorer,  et  de  nous  addonner  a  son  obeissance.  Et  ceci  nous  doit  servir  a  deux  choses.  Car  nous  voyons  en  premier  lieu,  comme  les  Papistes  sont  enragez,  quand  ils  prennent  ces  tesmoignages  pour  fonder  leurs  merites.  O  voila  (diront-  ils)  il  est  parle  de  droiture:  nous  meritons  donc  envers  Dieu,  et  avons  les  coeurs  purs  et  droits  pour  venir  a  Dieu.  Helas!  et  d'ou  vient  ceste  droiture?  Meritons-nous  une  telle  louange  de  la  bouche  de  nostre  Dieu?  Et  il  nous  pourroit  condamner  cent  mille  fois  sans  user  de  grace  envers  nous:  mais  d'autant  qu'il  efface  et  oublie  nos  fautes,  et  qu'il  ne  veut  point  y  avoir  esgard,  voila  pourquoi  il  nous  accepte  comme  iustes.  Et  ainsi  cognoissons  ici  seulement  sa  misericorde  et  sa  pure  bonte:  et  faisons  lui  hommage.  Et  au  reste  nous  devons  prendre  courage  de  bien  faire,  quand  il  est  dit  que  nostre  Seigneur  se  contente  de  nous,  et  qu'il  advoue  comme  bon  et  louable,  ce  qui  toutes  fois  est  pollu:  et  que  combien  qu'il  y  ait  a  redire,  et  qu'il  y  ait  des  fautes  et  imperfections  grandes  en  nos  oeuvres,  et  que  nous  serions  dignes  que  Dieu  nous  detestast,  d'autant  que  tout  ce  que  nous  lui  pouvons  apporter  est  la  comme  puantise:  si  est-ce  qu'il  l'accepte  comme  sacrifice  de  bonne  odeur,  et  recoit  les  oeuvres  qui  sont  ainsi  entachees  de  vices.  Puis  qu'ainsi  est,  ne  devons  -  nous  point  estre  tant  plus  enflammez  a  le  servir  et  honorer?  Voila  donc  ce  que  nous  avons  a  noter  en  ce  passage.  Or  cependant  notons  aussi,  que  nous  aurons  beau  faire  des  actes  heroiques  (comme  on  appelle)