6:495  DE  NECESSITATE  legibus  liberas  et  solutas  esse  docuimus.  Hanc  libertatem,  quae  acquisita  esset  Christi  sanguine,  non  esse  prostituendam.  In  hac  causa  si  quis  nos  reos  faciat,  trahat  in  eundem  simul  reatum  et  Christum  et  apostolos  necesse  est.  Necdum  alia  mala,  quae  nos  in  humanas  traditiones  invehi  coegerunt,  enumero.  Duo  tantum  ponam:  quibus  auditis,  aequos  omnes  lectores  contentos  fore  confido.  Nempe  quod  earum  nonnullae,  quum  praestandi,  quod  exigebant,  facultatem  excederent,  nihil  quam  ad  hypocrisin  inducere,  vel  in  desperationem  coniicere  homines  possent.  In  omnibus  autem  usu  venerat,  quod  exprobrabat  Christus  Pharisaeis  :  ut  propter  eas  irrita  fierent  mandata  Dei.  Exempla  huc  adducam,  quibus  id  magis  perspicuum  fiet.  Tria  sunt,  de  quibus  maxime  nobis  succensent:  quod  liberum  fecerimus  quovis  die  esum  carnium;  quod  sacerdotibus  coniugium  permiserimus;  quod"  secretam  confessionem,  quae  ad  sacerdotis  [pag.  71]  aurem  fiebat,  repudiaverimus.  Respondeant  mihi  bona  fide  adversarii,  an  non  asperius  puniatur  apud  eos,  qui  carnem  die  Veneris  gustaverit,  quam  qui  toto  anni  cursu  assidue  scortatus  sit?  An  non  capitalius  censetur  crimen,  si  uxorem  duxerit  sacerdos,  quam  si  centies  in  adulterio  fuerit  deprehensus?  An  non  facilius  ignoscunt,  si  quis  multa  Dei  praecepta  contempserit,  quam  si  peccata  sua  neglexerit,  semel  quotannis,  in  aurem  sacerdotis  confiteri?  Quale,  obsecro,  portentum,  delictum  videri  leve  et  venia  dignum,  si  quis  sacrosanctam  Dei  legem  violaverit:  si  quis  autem  hominum  placita  transgressus  fuerit,  scelus  inexpiabile  haberi?  Non  est  quidem  novum  exemplum,  fateor.  Nam  et  huius  pravitatis,  quemadmodum  dixi,  insimulat  Christus  Pharisaeos,  quod  propter  suas  traditiones  irrita  faciant  mandata  Dei  (Matth.  15,  6).  Haec  vero  illa  est  Antichristi  arrogantia,  de  qua  loquitur  Paulus,  quod  sedeat  in  templo  Dei,  ostentans  se  pro  Deo  (2  Thess.  2,  4).  Ubi  enim  incomparabilis  Dei  maiestas,  postquam  huc  mortalis  homo  provectus  est,  ut  eius  leges  aeternis  Dei  decretis  praeferantur?  Omitto  quod  ciborum  et  coniugii  prohibitionem,  doctrinam  daemoniorum  appellat  apostolus  (1  Tim.  4,  3).  In  eo  quidem  iam  plus  satis  mali.  Sed  hic  supremus  est  impietatis  cumulus,  altiore  gradu  hominem  collocare,  quam  Deum.  Si  negant  me  verum  dicere,  ego  ad  rem  provoco.  Iam  duae  illae,  de  caelibatu  et  auriculari  confessione,  leges  quid  aliud  sunt  quam  dirae  animarum  [pag.  72]  carnificinae?  Ut  omnes  ecclesiarum  ministri  perpetuam  castitatem  voveant.  Voto  concepto,  ne  illis  unquam  uxores  ducere  fas  sit.  Quid  si  continentiae  dono  privatus  uratur?  Nulla,  inquiunt,  exceptio  hic  locum  habeat.  At  experientia  ostendit,  quanto  praestitisset,  nunquam  sacerdotibus  impositum  esse  hoc  iugum,  quam  in  fornace  libidinum