39:495  495  PRAELECTIONES  496  57.  M  inebriabo  principes  eius,  et  sapientes  eius,  ei  duces  eius,  et  praefectos  eius,  et  fortes  eius:  et  dormient  somnum  perpetuum,  et  non  expergefiet,  dicit  rex,  cuius  nomen  est  Iehovah  exercituum.  Prosequitur  Ieremias  eandem  sententiam.  Heri  dixit  venturos  esse  vastatores,  qui  Babylonem  perderent:  nunc  similitudine  noc  confirmat,  deus  autem  ipse  loquitur:  dicit,  Inebriabo  tam  principes,  ac  duces,  quam  milites  et  omnes  consiliarios.  Videtur  hoc  verbo  alludere  ad  convivium  illud  ultimum,  de  quo  narrat  Daniel,  et  profani  etiam  scriptores  subscribunt.  Quum  enim  celebre  esset  epulum  apud  Babylonios,  urbs  illa  nocte  capta  fuit,  non  tantum  industria  et  virtute  Cyri,  sed  etiam  proditione  eorum  qui  desciverant  a  Balsazare.  Quum  ergo  deprehensi  fuerint  in  illo  convivio,  et  rex  ea  nocte  fuerit  iugulatus  cum  suis  satrapis,  videtur  Deus  eo  respicere,  quum  denuntiat,  ubi  ipsos  inebriaverit,  obrutum  iri  somno  perpetuo.  Mors  enim  statim  commessationem  illam  sequuta  est  :  protraxerant  convivium  ad  mediam  noctem,  et  quum  adhuc  sederent  in  mensa,  repente  tumultus  exortus  est  in  urbe,  et  rex  audivit  se  esse  in  manu  hostium.  Quoniam  ergo  continua  fuit  series  epuli  et  mortis,  concinna  est  allusio  apud  prophetam,  quum  Deus  minatur  somnum  perpetuum  Babyloniis,  ubi  ipsos  potaverit.  Caeterum,  hic  commemorat  tam  praefectos,  et  duces,  quam  consiliarios,  et  omnes  sapientes.  Scimus  enim  inflatos  fuisse  Babylonios  duplici  illa  fiducia,  quod  putarent  se  eximia  perspicacia  esse  praeditos:  deinde  instructos  etiam  bellica  virtute.  Haec  ratio  est  cur  propheta  pluribus  verbis  exprimat,  Duces  omnes  Babylonis  et  praefectos,  utcunque  polleant  magno  acumine  et  prudentia,  tamen  obrutum  iri  perpetuo  somno  antequam  e  mensa  sua  surgant.  Notandum  vero  est,  multis  ante  annis,  Ieremiam  ita  fuisse  vaticinatum  de  Babylone.  Et  hinc  colligimus  tam  eius  mentem  quam  linguam  fuisse  gubernatam  a  spiritu  Dei,  quia  non  poterat  coniicere  quod  futurum  erat  post  annos  80.  Atqui  tantum  intercessit  temporis  inter  vaticinii  tempus  et  ipsum  eventum,  ut  paulo  post  videbimus.  Caeterum  hic  propheta  utitur  forma  loquendi,  quae  frequenter  occurrit  in  scriptura,  nempe  socordiam  speciem  esse  ebrietatis,  qua  Deus  ipse  arcano  suo  iudicio  homines  dementat.  Notandum  igitur  est,  quidquid  est  in  mundo  prudentiae  et  solertiae,  ita  esse  donum  Dei  ut  quoties  visum  fuerit,  caecutiant  sapientissimi  quique,  tanquam  ebrii  aut  aberrent  aut  labantur:  sed  tenendum  est  quod  iam  dixi,  prophetam  alludere  ad  ipsam  historiam,  quia  continuus  fuit  transitus  a  convivio  ad  mortem.  Iam  sequitur,  58.  Sic  dicit  Iehovah  exercituum,  Murus  Babylonis  latitudinis  (hoc  est,  latus)  dissipando  dissipabit