25:495  495  COMMENTARIUS  IN  IOSUE  CAP.  X.  496  quam  soli  consules,  et  legati,  ac  tribuni,  senatus  et  populi  iniussu  iuraverant.  Pius  ergo  laudis  meretur  rudis  illa  simplicitas,  in  qua  maior  viguit  religio,  quam  nimis  arguta  disquisitio,  in  qua  sibi  hodie  placet  ac  plaudit  maior  pars  hominum.  Etsi  autem  indignatur  populus,  duces  plus  aequo  sibi  sumpsisse,  modestiae  tamen  est  quod  non  ultra  murmur  et  strepitum  progreditur.  20.  Hoc  faciemus  eis.  Quamvis  ex  pacto  vitam  concedant  Gibeonitis,  non  tamen  nisi  dimidia  ex  parte  ratum  habent  foedus.  Nam  quum  plena  Gibeonitis  praestanda  esset  incolumitas,  nunc  libertas  vita  ipsa  carior  eripitur.  Unde  coniicimus,  Iosue  cum  reliquis,  ut  in  re  dubia  et  perplexa,  medium  aliquid  excogitasse,  ne  prorsus  inane  esset  iusiurandum.  Praecipua  quidem  huius  consilii  ratio  fuit,  multitudinem  placare:  quia  tamen  indigne  ferebant  verba  sibi  esse  data  a  Gibeonitis,  vafritiem  ulti  sunt,  ne  impunitas  ludibrium  augeret.  Porro  fuit  haec  dura  conditio,  non  tantum  addici  ad  operas  serviles,  sed  abstrahi  a  suis  domibus,  ut  vagam  et  erraticam  vitam  agerent.  Calonum  munus  illis  iniungitur  vile  non  minus  quam  laboriosum.  Sed  cumulus  molestiae  est,  ligna  caedere  et  haurire  aquam  ubicunque  Deo  placuerit  arcam  locare.  22.  Vocavit  eos  Iosue*  Quia  tristem  sententiam  et  acerbam  laturus  erat,  praefatur  nihil  se  iniquum  statuere,  quia  nihil  minus  conveniat,  quam  dolos  et  fallacias  suis  autoribus  lucrum  afferre.  Expostulat  igitur  quod  mentiendo  periculum  a  se  depulerint:  deinde  mox  pronunciat  maledictos  esse:  qua  voce  interpretor  culpam  servitutis  in  illos  reiici,  quod  nihil  perferant  durius  quam  promeriti  sunt  dolo  vel  perfidia:  ac  si  diceret,  damnationis  quam  profert  materiam  in  ipsis  residere.  Asperum  quidem  nullum  temporis  finem  dari  laboribus  quibus  mancipantur:  sicuti  et  verba  sonant:  Nunquam  desinent  ex  vobis  esse  servi:  sed  nihil  iniuriae  fieri  illis  pronunciat,  quia  sponte  vel  suo  vitio  maledicti  sint.  Ipsi  quidem  obiecta  quae  eos  coegit  necessitate,  crimen  extenuant:  neque  tamen  poenam  detrectant,  qua  agnoscunt  iuste  se  castigari.  Fieri  quidem  potest,  ut  metu  oppressi  nihil  recusaverint:  imo  placide  nec  sine  assentatione  impositis  sibi  legibus  acquieverint.  Quid  enim  proficerent  litigando?  Verum  quia  male  sibi  conscii  erant,  nec  poterant  crimen  prorsus  diluere:  non  dubito  quin  secum  valde  humaniter  agi  censuerint,  modo  salva  esset  vita.