5:494  observatus,  ut  si  quid,  vel  in  doctrina  erroris,  vel  in  [fol.  34]  disciplina  vitii  exortum  esset,  statim  coacto  pio  concilio,  neque  gener?li  semper,  sed  provinciali  potius  vel  nationali,  correctionem  idoneam  quaererent.  Nec  hodie  melior  futura  erat  ratio,  si  suum  ecclesiis  ius  permitteretur.  At  quis  neget  unius  romani  pontificis  arte  et  vi  factum  esse,  ut  nullum  iam  intra  annos  quadringentos  vere  pium  et  liberum  concilium  in  occidentalibus  ecclesiis  cogeretur,  quanquam  innumerae  interim  labes  et  aliae  subinde  aliis  importuniores  in  doctrinam,  in  mores  totamque  religionis  administrationem  invaserint?  Constantiense  quale  fuit?  In  quo,  ut  reliqua  taceam,  quae  summam  ignorationem  cum  temeritate  coniunctam  ostendunt,  nihil  puduit  sanctos  Romanenses,  hominem  innocentem,  fide  publica  vocatum,  non  minore  perfidia  quam  saevitia  trucidare.  Nam  quod  communione  calicis  in  coena  populo  interdixerunt,  si  qua  vel  scientiae  vel  pudoris  scintilla  in  ipsis  fuisset,  an  unquam  facere  essent  ausi?  Sed  per  tumultum  et  ferociam  quidvis  decernere  promptum  est,  ubi  non  aliud  agitur  quam  ut  armata  manu  exsequamur  quod  libuerit.  Et  tamen  illic,  ne  omnia  perversa  essent,  decretum  fuit  ut  decimo  quoque  anno  concilium  haberetur.  Quando  ex  hoc  decreto  habitum?  Nam  Basiliense  nec  suo  tempore  indictum  fuit,  et  tamen  ut  interciperetur,  strenue  romanis  artibus  curatum  est.  Primum  transferendi  eius  praetextu  bis  dissolvere  admolitus  est  Eugenius.  Quum  nihil  hac  via  proficeretur  Ludovicum  tunc  Galliae  Delphinum  ad  horibilem  Alsatiae  direptionem  vastationemque  armavit.  Nec  ullum  crudelitatis  genus  est  praetermissum,  quo  ad  discessionem  adigerentur,  qui  conventum  habebant.  Quum  illi  vel  constantia  vel  pertinacia  superiores  exstitissent,  non  conquievit  bonus  pontifex,  donec  concussa  fere  tota  Europa  tandem  extorsit,  ut  acta  omnia  rescinderentur.  Et  tamen  si  quis  vere  reputet,  spectrum  illic  concilii  fuit  magis  quam  verum  concilium.  Quid  igitur  facturum  putemus,  si  in  rem  semel  ventum  fuerit?  Sed  hoc  est  nimirum  quod  iam  aliquoties  dixi:  sicut  apostolicis  viris  mos  est,  statim  ut  vitiari  aliquid  in  religione  contigerit,  ut  obviam  eatur,  sancta  concilia  congregare,  sic  romanis  antichristis,  quia  non  nisi  ex  vitiata  mercede  voluptuantur  et  regnant,  semper  solenne  fuit  et  hodie  est,  legitimum  omne  concilium  re  vera  morte  peius  odisse,  refugere,  avertere,  falsa  autem  eius  promissione,  quoties  reformationis  metus  aliunde  iniicitur,  orbem  lactare,  ut  concilium  effugiant.  Quod  si  extortum  illis  semel  fuerit  ut  cogatur  Acheronta  potius  et  inferos  totos  movebunt  quam  ad  umbilicum  venire  sinant.  Quod  nisi  serio  coeptum  esset  de  concilio  nationali  prout  ecclesiae  necessitas  flagitabat  habendo  deliberari,  pontificii  hac  parte  satis  conquiescerent,  [fol.  35]  nec  sibi  ipsis  ulla  tam  ingratae  rei  mentione  molesti  essent.