37:494  et  prosperum,  quia  pugnat  sub  auspiciis  Dei.  Sed  simul  etiam  adiungitur,  Super  totam  terram.  Loquitur  haud  dubie  Deus  non  de  toto  orbe,  sed  de  terra  Iehudah.  Nam  hac  lege  electus  fuit  Ieremias  ut  operam  suam  electo  populo  impenderet.  Dicitur  ergo  fore  victor  totius  Iudaeae.  Postea  sequitur  Contra  reges  Iehudah.  Scimus  unum  duntaxat  fuisse  regem  in  Iudaea:  sed  Deus  prophetam  suum  hortatur  ad  perseverantiam:  quasi  diceret  fore  illi  longum  militiae  cursum,  ne  taedio  ob  longam  moram  deficiat.  Sensus  igitur  est,  prophetam  non  militaturum  contra  unum  regem,  sed  mortuo  uno,  adhuc  nova  certamina  instare,  ut  scilicet  apud  se  statuat,  nullam  fore  spem  quietis,  donec  peregerit  totum  illud  tempus,  quod  Deus  apud  se  destinaverat.  Scimus  enim  etiam  qui  probe  animati  sunt  ad  parendum,  tamen  expetere  sibi  praefigi  aliquod  tempus,  ut  postea  tanquam  milites  emeriti  vacationem  obtineant.  Deus  autem  hic  prophetae  suo  denuntiat,  ubi  ad  mortem  unius  regis  strenue  certaverit,  nihilo  tamen  meliorem  fore  eius  conditionem,  quoniam  succedent  alii,  quibuscum  necesse  erit  etiam  confligere,  quoniam  eadem  manebit  et  pravitas  et  obstinatio.  Regibus  adiungit  principes  et  sacerdotes,  postremo  etiam  totum  populum.  Si  rex  quispiam  oblitus  officii  tyrannice  imperet,  saepe  tamen  continget  ut  adsint  aliqui  moderatores,  qui  temperent  eius  libidines,  si  non  possint  in  totum  corrigere.  Videmus  enim  crudelissimos  tyrannos  saepe  placari  a  bonis  consiliariis.  Sed  Deus  hic  prophetam  suum  admonet,  res  ita  desperatas  esse  in  Iudaea,  ut  si  reges  improbi  sint  ac  scelerati,  etiam  consiliarios  habeant  perversos,  et  eodem  praeditos  ingenio-  Quod  de  sacerdotibus  sequitur  posset  videri  magis  prodigiosum,  nisi  quia  passim  testatur  scriptura,  sacerdotes  leviticos  fuisse  omnes  fere  degeneres  et  apostatas,  ita  ut  vix  centesimus  quisque  ostenderet  minimum  pietatis  signum.  Quum  ergo  ordo  ille  sic  esset  corruptus,  non  est  quod  miremur  denuntiari  Ieremiae  bellum  cum  sacerdotibus,  et  postea  in  progressu  videbimus  hoc  fuisse  completum.  Quia  autem  poterat  videri  excusabile  vulgus,  sicuti  maior  est  illic  simplicitas,  quam  in  proceribus  (nam  qui  eminent,  vel  superbia  vel  crudelitate  delinquunt,  vel  permittunt  sibi  nimium  licentiae,  confisi  sua  praestantia:  in  plebe  autem,  quemadmodum  dixi,  saepe  apparet  in  speciem  plus  modestiae)  sed  Deus  hic  pronuntiat  tantam  impietatem  grassari  in  Iudaea,  ut  a  minimo  usque  ad  maximum  omnes  sint  perversi.  Fuit  igitur  armandus  propheta,  quemadmodum  nuper  dixi.  Quid  enim  poterat  reputare,  si  non  fuisset  in  tempore  admonitus,  et  postea  expertus  fuisset  tantam  petulantiam,  imo  tantam  rabiem  in  summis  et  infimis,  ut  hostiliter  bellandum  esset  cum  electo  Dei  populo,  non  secus  atque  cum  diabolis?  Postea  sequitur,