35:494  procedure  qu'il  tenoit,  mais  cependant  sa  cause  estoit  bonne.  Au  contraire  les  amis  de  Iob  ont  eu  de  belles  raisons,  et  dont  nous  avons  recueilli  doctrine  saincte:  mais  tant  y  a  que  leur  fondement  estoit  mauvais.  Ils  prenoyent  un  argument  general  hors  de  propos:  c'est  que  Iob  estoit  puni  a  cause  de  ses  malefices,  et  qu'il  le  falloit  tenir  comme  meschant  et  execrable,  puis  que  Dieu  usoit  d'une  telle  rigueur  contre  lui.  Et  au  reste  ils  avoyent  aussi  une  doctrine  fausse  et  perverse,  disans  que  Dieu  traitte  les  hommes  en  ce  monde  selon  qu'ils  l'ont  deservi.  Or  c'estoit  oster  l'esperance  de  la  vie  eternelle,  et  enclorre  toute  la  grace  de  Dieu  en  ceste  vie  caduque  et  fragile:  c'estoit  donc  pour  tout  pervertir.  Et  ainsi  il  nous  faut  reduire  en  memoire  ces  deux  poincts-la,  pour  cognoistre  la  droiture  dont  il  est  ici  parle.  Et  somme  il  nous  faut  noter  ce  que  nous  avons  allegue  par  ci  devant  du  Pseaume  (41,  2),  Bienheureux  est  celui  qui  iuge  sagement  du  povre  en  son  tonnent:  ou  le  Prophete  nous  monstre  que  quand  nous  voyons  quelque  homme  estre  afflige,  Dieu  veut  que  nous  ayons  ceste  prudence-la  de  ne  le  point  condamner  du  premier  coup:  mais  que  nous  regardions  plus  haut:  assavoir  que  les  afflictions  viennent  aucunesfois  aux  hommes  pour  les  chastier  de  leurs  pechez:  aucunesfois  pour  esprouver  leur  patience:  aucunesfois  que  Dieu  veut  prevenir  quelques  fautes  ausquelles  ils  pourroyent  tomber:  que  Dieu  aussi  les  constitue  comme  miroirs,  afin  que  voyans  leur  obeyssance  nous  en  soyons  edifiez,  aucunesfois  il  y  a  des  causes  secrettes,  qui  nous  sont  incognues.  Gardons-nous  donc  de  temerite,  quand  nous  voyons  que  Dieu  tormente  rudement  quelqu'un:  que  nous  n'ayons  point  un  iugement  volage,  pour  prononcer  contre  lui  qu'il  est  digne  d'estre  ainsi  manie,  et  pour  priser  ceux  qui  sont  a  leur  aise,  comme  s'ils  estoyent  mieux  aimez  de  Dieu,  car  c'est  iuger  par  trop  a  l'estourdie,  que  cela.  Quand  donc  nous  aurons  ceste  humanite  en  nous,  de  regarder  les  causes  qui  nous  sont  notees  en  l'Escriture,  nous  trouverons  souvent  que  ceux  qui  sont  les  plus  excellens  serviteurs  de  Dieu  sont  traittez  en  plus  grande  rigueur,  et  nous  semblera  que  Dieu  leur  soit  contraire,  mais  nous  n'en  iugerons  point  a  nostre  phantasie.  Quand  nous  aurons  ceste  modestie-  la,  Dieu  nous  soulagera  tousiours  quand  nous  serons  affligez,  mais  si  nous  sommes  cruels  et  follement  excessifs  pour  prononcer  sentence,  il  faudra  aussi  qu'il  nous  soit  rendu  en  pareille  mesure.  Et  au  reste  pour  mieux  comprendre  ce  qui  est  ici  dit,  que  Iob  a  parle  droitement,  et  que  ses  amis  non:  il  nous  faut  prendre  ceste  regle  generale,  que  quand  un  homme  sera  en  train  de  suivre  Dieu  et  le  craindre:  cela  sera  accepte,  encores  qu'il  commette  de  lourdes  fautes:  si  un  autre  n'a  point  une  vraye  racine  de  crainte  de  Dieu  en  soi:  combien