5:493  CONSILIUM  PAULI  III.  habet  animarum  carnifices,  quod1)  suo  charactere  satellites  notat,  quod  non  modo  de  verbi  Dei  ministerio  nihil  sunt  solliciti,  sed  quoad  possunt  ferro  et  igni  persequuntur,  quod  dum  coniugium  aspernantur,  ut  se  impuri  caelibatus  larva  venditent,  non  tantum  omnium  [fol.  33]  toris  insidiantur,  sed  terram  ipsam  obscoenis  libidinibus  contaminant,  id  videtur  perquam  tolerabile.  Monstrum  erit,  si  disciplinam  erigant  Germani,  qualis  et  a  Christo  requiritur  et  in  veteri  ecclesia  fuit,  ut  populus  quibus  expedit  rudimentis  in  ordine  retineatur,  ut  pigri  exstimulentur,  moneantur  imperiti,  reprehendantur  qui  deliquerint,  idque  pro  modo  delicti  fiat,  coerceantur  contumaces,  in  hunc  usum  ministros  et  seniores  habeat  ecclesia,  qui  censuram'  exerceant,  et  severitatem  quoque  a  Christo  institutam,  ubi  opus  erit,  adhibeant.  At  quod  nunc  pseudoepiscopi  de  potestate  ecclesiastica  impudenter  nundinantur,  quod  excommunicatio  res  saluberrima  in  extraneum  prorsus  usum  degeneravit,  quod  impune  palam  feruntur  multa  non  toleranda  flagitia,  quod  populus  sine  correctione  vagus  diffluit,  nec  aliud  curatur,  nisi  ut  bestiis  istis  salvum  maneat  suum  regnum;  in  eo  sunt  merae  deliciae?  Monstrum  horrendum  edent  Germani,  si  de  facultatibus  ecclesiae  rite  dispensandis  hiscere  ausint,  nedum  si  deliberent  de  reprimenda  istorum  latronum  direptione,  ut  opes  Deo  dedicatae  in  eum,  cui  destinatae  sunt,  usum  conferantur.  At  quod  nunc  ex  tantis,  quae  ecclesiae  relictae  sunt,  facultatibus,  nihil,  unde  alantur  fideles  ministri,  fit  reliquum,  nihil  scholis,  nihil  pauperibus  residuum  est,  quorum  revera  esse  debuerant  omnia,  aut  absorbent  inexplebiles  illi  gurgites,  et  indignis  modis  dilapidant,  alii  in  scortationem,  alii  in  aleam,  alii  in  veneficia  aut  caedes,  omnes  in  profanos  et  minime  consentaneos  ordini  suo  luxus:  hoc  procul  abest  a  monstro.  Quid  plura  dicam?  Nihil  hodie  monstri  est  in  mundo,  ubi  omnia  incomposita,  luxata,  dissoluta,  inversa,  deformata,  distorta,  confusa,  dissipata,  disiecta,  mutila  esse  notissimum  est.  Monstrum  erit,  si  quis  hanc  lernam  repurgandi  animo  attrectet,  imo  si  quis  ad  remedium  tantis  malis  afferendum  vel  minimum  digitum  admoveat.  Hic  exclamare  libet,  non  in  puerum  hunc  duntaxat,  sed  totam  romanensem  catervam:  o  portenta,  non  dicam  in  ultimas  terras  exportanda,  sed  culeo  insuenda,  quando  omnes  scortea  sapiunt,  qui  sunt  ex  illa  faece.  Fuit  etiam  mos  antiquus  et  ab  apostolis  traditus  ad  haec  iisque  tempora  conservatus,  ut  in  controversiis  fidei  concilium  adhiberetur,  quo  sequestre  et  medio  controversiae  omnes  finirentur  et  pax  restitueretur.  Fuit  certe  mos  ille  diu  non  immerito  sanctis  1)  Sic  male  archetypon  pro:  quot.