5:492  natur,  omni  caret  monstri  suspicione?  Si  excussa  inutilium  vel  etiam  impiarum  traditionum  iugo  et  saeva  illa  conscientiarum  carnificina,  regulam  vivendi  ab  uno  legislatore  et  magistro  petant  Germani,  interim  tamen  non  ea  negligant  exercitia,  quae  et  Christi  legibus  sint  consentanea,  et  ad  eas  observandas  subsidio  esse  queant,  monstrum  erit.  At  quod  praepostera  obedientia  [fol.  32]  Dei  verbo  praeferuntur  hominum  leges,  quod  in  frivolis  ac  inanibus  observatiunculis  homines  obstupescunt,  quod  sine  ullo  fructu  aut  aedificatione  in  nugis  illis  servandis  se  excruciant,  quod  illic  iustitiam  collocant,  in  eo  nihil  est  monstri.  Monstrum  erit,  si  sacramenta  a  Domino  instituta  Germani  ad  nativum  finem  revocent,  ut  nimirum  communicationem  Christi  plenius  illic  percipiant  fideles  animae,  et  in  gratia  Dei  roborentur,  et  tam  exerceantur  ad  studium  sanctae  vitae,  quam  in  Christi  agnitione  augescant:  si  deinde  operam  dederint  ut  caeremoniae  ritusque  omnes  in  hunc  scopum  conferantur,  eas  autem,  quae  sunt  prorsus  alienae,  abrogaverint.  At  quod  sacrosanctis  Christi  mysteriis  insolenter  abutuntur  sacrificuli  ad  obscoenam  nundinationem,  nihil  inde  spiritualis  emolumenti  ad  populum  redit;  quod  baptismus,  quo  nos  initiari  oportuerat  in  veram  puritatem,  tot  modis  est  contaminatus;  quod  sacratissima  coena  tot  implicita  sacrilegiis  fere  obsoleta  et  in  nihilum  redacta  est,  eius  in  locum  successit  exsecrabilis  profanatio,  qua  et  Christus  sacerdotii  sui  honore  spoliatur,  et  impuri  sacrificuli,  quod  eius  proprium  erat  sibi  arrogant,  et  beneficium  quod  nobis  sua  morte  praestitit  obliteratur  ;  quod  immensa  caeremoniarum  farragine  ex  iudaismo  et  gentilitate  permixta  christianae  ecclesiae  obruuntur;  quod  plurimae  ex  iis  nullam  significationem  habent,  multae  etiam  prorsus  sunt  ridiculae  et  pueriles;  quod  non  modo  crassis  ineptiis  populus  perpetuo  occupatur,  sed  in  manifestam  impietatem  se  praecipitat,  dum  adorat  mortuorum  ossa,  statuis  et  imaginibus  supplicat  et  multa  eiusmodi  designat,  id  nihil  habet  vitii.  Si  tyrannide  Antichristi,  quae  hactenus  apud  nos  grassata  est,  abolita,  eos  ecclesiis  ministros  praeficiant  Germani,  qui  officium  suum  noverint  et  exerceant,  qui  sana  doctrina  plebem  pascant,  sanctae  vitae  exemplo  praeeant  omnibus,  in  salutem  ecclesiae  sedulo  advigilent,  patres  denique  et  pastores  se  esse  meminerint,  neque  plus  sibi  usurpent,  quam.  ut  sub  unius  Christi  magisterio  populum  retineant,  iidem  familiam  prudenter  et  moderate  regant,  liberos  in  timore  Dei  erudiant,  coniugium  qua  decet  honestate  et  pudicitia  colant,  non  tantum  monstrum  erit,  sed  aliquid  monstro  immanius.  At  quod  idolum  illud  romanum  in  sanctuario  Dei  sese  pro  Deo  ostentat  et  adoratur,  quod  miserrima  servitute  universum  orbem  premit,  quod  potestate  quam  falso  praetexit  ad  perniciem  omnium  abutitur,  quod  tot